கிரிமினல் பொன்.மாணிக்கவேலை காப்பாற்றும் ஆர்.எஸ்.எஸ்.!

காவல்துறை அதிகாரியாக பணியில் சேர்ந்ததிலிருந்து ஒரு கிரிமினலாக சுற்றிக்கொண்டருந்தவர் பொன்.மாணிக்கவேல். சாதி பின்னணி, RSS பின்னணி ஆகியவற்றுடன் ஊடகத்தையும் பயன் படுத்திக்கொண்டு யோக்கியவான் போல வலம் வந்தார். ஆனால், சிலை தடுப்புப்பிரிவு அதிகாரியாக பொறுப்பேற்ற பிறகு மக்களிடையே அம்பலமானார். சிலை கடத்தல் பேர்வழிகளோடு கூட்டு சேர்ந்தது மட்டுமல்லாது, RSS கும்பலோடும் இணைந்து இந்து அறநிலையத்துறையை ஊழல் மலிந்த துறையாக கட்டமைக்க திட்டமிட்டார். ஆனால், அத்தனையும் தோல்வியில் தான் முடிந்தது.

ஏனென்றால்,இந்து அறநிலையத்துறை வரலாறு சாதாரணமானதல்ல; 1927ஆம் ஆண்டு ‘இந்து அறநிலையங்கள் சட்டம்’ கொண்டு வந்தது நீதிக்கட்சி. இதன் மூலம் குறிப்பிட்ட சமூகத்திடம் அடைபட்டுக் கிடந்த கோயில்கள் அனைத்து சமூகங்களுக்கும் பொதுவானதாக, அரசின் கட்டுப்பாட்டுக்குள் கொண்டு வரப்பட்டன.

இதன் தொடர்ச்சியாகத்தான், 1959ஆம் ஆண்டு,தமிழ்நாடு இந்து சமய அறநிலையத்துறை சட்டம் கொண்டு வரப்பட்டது. தற்போது இந்த துறையின் கீழ், 43712 கோயில்கள், 22 சமணக் கோயில்கள், 45 மடங்கள், 69 மடங்களுடன் இணைந்த கோயில்கள், 1263 அறக்கட்டளைகள் மற்றூம் 1130 குறிப்பிட்ட அறக்கட்டளைகள் நிர்வகிக்கப்பட்டு வருகிறது. இந்த பட்டியலில் வராத இன்னும் சில கோயில்கள் குறிப்பிட்ட சமூகத்திடம் சிறைபட்டு கிடக்கின்றன.

இந்து சமயத்தை பின்பற்றும் அனைத்து சமூகத்தினரின் உரிமைகளை நிலைநாட்ட திராவிட இயக்கம் முன்னெடுக்கும் முயற்சிகளுக்கு நூறு ஆண்டுகள் வரலாறு உள்ளது. இந்தியாவுக்கே முன்மாதிரியாக விளங்கும் தமிழ்நாட்டின் இந்து சமய அறநிலையத்துறைக்கு எதிராக, இந்துக்கள் என்ற பெயரில் பார்ப்பன நலனுக்காக மட்டும் இயங்கும் ஆர்.எஸ்.எஸ். சங்கபரிவார கும்பல் காலங்காலமாக போரை தொடுத்து வருகின்றன.

தமிழ்நாட்டில் பெரும்பான்மையாக உள்ள இந்து சமய நம்பிக்கை கொண்டோரின் நலன்களுகாக இந்து சமய அறநிலையத்துறை முன்னெடுக்கும் ஒவ்வொரு திட்டத்தையும், அவாளுக்காகவே செயல்படும் நீதிமன்றங்கள் மூலம் தடுத்தும், முடக்கியும் வருகின்றனர். சிதம்பரம் நடராஜர் கோவிலில் நடக்கும் தமிழர் விரோத செயல்பாடுகளும், அவற்றுக்கு நீதிமன்றங்கள் வழங்கும் சட்ட பாதுகாப்புமே சாட்சி!

இந்து சமய அறநிலையத்துறைக்கு எதிரான ஆர்.எஸ்.எஸ் - பாஜக கும்பலுக்கு அடியாளாக கடந்த சில ஆண்டுகளாக செயல்பட்டு வருபவர் தான் ஓய்வுபெற்ற காவல்துறை அதிகாரி பொன்.மாணிக்கவேல். சிலை கடத்தல் தடுப்பு பிரிவின் தலைவராக அம்மையார் திலகவதி ஐபிஎஸ் அவர்கள் நிகழ்த்திய பல சாதனைகள் பெரிதும் பேசப்படாத நிலையில், ஆர்.எஸ்.எஸ். கும்பலால் திட்டமிட்டு அந்த துறைக்குள் அமர்த்தப்பட்ட பொன்.மாணிக்கவேலை சுற்றி காவல்துறையினரை விட ஊடக கேமராக்கள் புடைசூழ தான் வலம்வருவார்.

திலகவதி IPS

காவல்துறையில் தனக்கு கீழ் பணிபுரியும் காவலர்களை ‘ஓப்பன் மைக்கில்’ அநாகரிமாக பேசுவார், அவமரியாதை செய்வார், அடாவடி போக்கோடு நடந்து கொள்வார், காவல்நிலைய விசாரணையில் மிருகத்தனமாக செயல்படுவார், மொத்தத்தில் காக்கி சட்டையில் செயல்பட்ட ஒரு சைக்கோ என்பது தான் காவல்துறையினரே பொன்.மாணிக்கவேலை பற்றி கூறும் குற்றச்சாட்டுகள். 

சிலை கடத்தல் தடுப்பு பிரிவில் ஆர்.எஸ்.எஸ். அஜெண்டாவை நடைமுறைப்படுத்தும் முதல் வேலையாக, இந்து சமய அறநிலையத்துறை அதிகாரிகள், ஊழியர்கள் குறித்து பொதுவெளியில் தவறான, அவதூறான கருத்துகளை பரப்பிவிட்டார். இதன் உச்சமாக, காஞ்சிபுரம் ஏகாம்பரநாதர் கோவிலுக்கு தங்கம் வாங்கியது தொடர்பான வழக்கில், இந்து சமயஅறநிலையத்துறையைச் சார்ந்த நேர்மையான அதிகாரி திருமதி கவிதா அவர்களை பொய் வழக்கில் கைது செய்து திருச்சி சிறையில் அடைத்தார். சிலை கடத்தல் வழக்குகளில் ஆய்வு என்ற பெயரில் ஊடக கேமராக்களுடன் நுழைந்து கோயில் நிர்வாக அதிகாரிகளை மிரட்டுவது, பொய்யான குற்றச்சாட்டுகளை ஊடகங்களில் தெரிவிப்பது என்று செயல்பட்டார். 

கோயில் சிலைகளை தினமும் பரிமாரிப்பது, பூஜை புனஸ்காரங்கள் செய்வது பார்ப்பன அர்ச்சகர்கள் தான். ஆனால் கோயில் சிலை கடத்தல் வழக்குகளிலோ அல்லது தங்கம் வாங்கியது குறித்தோ ஒரு பார்ப்பன அர்ச்சகர் மேலும் வழக்கு பதிந்ததில்லை. பொன்.மாணிக்கவேலுவின் குறி எப்போதும் பார்ப்பனரல்லாத இந்து சமய அறநிலையத்துறை அதிகாரிகளாக தான் இருந்துள்ளனர்.

சிலை கடத்தல் தடுப்பு பிரிவிலிருந்து ரயில்வே பாதுகாப்பு படைக்கு மாற்றப்பட்ட பொன்.மாணிக்கவேலுவை, ஊரில் வேறு அதிகாரிகளே என்பது போல, மீண்டு சிலை கடத்தல் தடுப்பு பிரிவுக்கே சிறப்பு அதிகாரியாக நியமித்து உத்தரவிட்டது நீதிமன்றம். 2018ஆம் ஆண்டு பொன்.மாணிக்கவேல் பணி ஓய்வு பெற்றும் நீதிமன்றம் அவருக்கு பணி நீட்டிப்பு வழங்கி உத்தரவிட்டது. அரசின் எல்லா துறைகளிலும் நீண்டு விரிந்த ஆர்.எஸ்.எஸ். கும்பலின் கரங்கள் இவற்றை சாத்தியமாக்கின. நீதிமன்ற உத்தரவை தனக்கு சாதமாக வைத்துக்கொண்டு தமிழ்நாடு அரசுக்கு எதிராக, ஒன்றிய பாஜக அரசின் அடியாளாக செயல்பட தொடங்கினார் பொன்.மாணிக்கவேல்.

ஒரு கட்டத்தில் சிலை கடத்தல் தடுப்பு பிரிவில் பணியாற்றி வந்த SP ஒருவர், DSP ஒருவர், இன்ஸ்பெக்டர் 4 பேர், சப் -இன்ஸ்பெக்டர் 6 பேர் என்று மொத்தம் 12 அதிகாரிகள் கூட்டாக சேர்ந்து பொன்.மாணிக்கவேலுவுக்கு எதிராக காவல்துறை தலைமை இயக்குநரிடம் புகார் மனு அளித்தனர். தமிழ்நாடு காவல்துறை வரலாற்றில் முதன்முறையாக இந்த அவலம் நடந்தேறியது. அவர்களின் புகார் மனுவில், ”பொன்.மாணிக்கவேல் பொய்யாக வழக்கு பதிவு செய்ய வற்புறுத்துவதாகவும், மறுத்தால் மிக மோசமாக திட்டுவதாகவும் அதனால் எங்களை வேறு இடத்துக்கு பணி மாற்றம் செய்யுங்கள்” என்றும், இது குறித்து அவர் மீது நடவடிக்கை எடுக்கவும் வலியுறுத்தினர்.

சிலை கடத்தல் தடுப்பு பிரிவின் தலைவராக நீதிமன்றங்களின் துணையோடு பொன்.மாணிக்கவேல் செயல்பட்ட காலக்கட்டத்தில், அவரால் பாதிக்கப்பட்ட அப்பாவிகளில் முக்கியமானவர் அதே துறையில் பணிபுரிந்த டிஎஸ்பி காதர் பாட்சா.

காதர் பாட்சா

2005ஆம் ஆண்டு நெல்லை மாவட்டம், பழவூர் நாறும்பூநாதர் கோயிலில் 13 சிலைகள் கொள்ளையடிக்கப்பட்டன. 2006ஆம் ஆண்டு சிலை கடத்தல் தடுப்பு பிரிவில் சேர்ந்தார் காதர் பாட்சா. ஆய்வாளர் ஜீவானந்தம் தலைமையில் காதர் பாட்சா உள்ளிட்ட சிலை கடத்தல் தடுப்பு பிரிவு போலீசார் தீவிர புலன் விசாரணைக்கு பின்னர், தீனதயாளன் என்ற சிலை கடத்தல் கும்பல் தலைவனை கைது செய்து, அவனிடமிருந்து 4 சிலைகளை மீட்டனர். பழவூர் வழக்கில் 2008ஆம் ஆண்டே இறுதி விசாரணைஅறிக்கை தாக்கல் செய்யப்பட்டு வழக்கு நடைபெற்று வந்தது.

2017ஆம் ஆண்டு சிலை கடத்தல் தடுப்பு பிரிவுக்கு பொறுப்பேற்றார் பொன்.மாணிக்கவேல். தமிழ்நாட்டில் சிலை கடத்தலில்ல் மிகமுக்கிய குற்றவாளியான தீனதயாளன் மீதான வழக்கை நடத்தி அவருக்கு தண்டனை வாங்கி தந்திருப்பார் என்று நாம் நினைத்தால், அது தான் இல்லை. நடந்தது என்ன தெரியுமா?

தீனதயாளனை கைது செய்து சிலை கடத்தல் கும்பலை முடக்கி வைத்த ஜீவானந்தம், காதர் பாட்சா ஆகியோருக்கு எதிராக தீனதயாளனிடமிருந்தே ‘வாக்குமூலம்’ பெற்று, அவரை அப்ரூவராக மாற்றி, அந்த காவல் அதிகாரிகளுக்கு எதிராக வழக்கை பதிவு செய்தார் பொன்.மாணிக்கவேல்.

அதாவது பழவூர் சிலைகளை தீனதயாளன் வெளிநாட்டில் உள்ள சிலை கடத்தல் கும்பலை சேர்ந்த சுபாஷ் கபூரிடம் விற்றுவிட்டார். அந்த சிலை பல நாடுகளுக்கு அடுத்தடுத்து கடத்தப்பட்டு 2008ஆம் ஆண்டு இந்தியாவுக்குள் கொண்டு வரப்பட்டதாகவும், இந்த தகவலை மறைத்ததன் மூலம் சுபாஷ் கபூரை காப்பாற்ற காதர் பாட்சா உள்ளிட்ட அதிகாரிகள் முயன்றதாக வழக்கு.

உண்மை என்னவென்றால், வெளிநாடுகளுக்கு கடத்தப்பட்டு 2008ஆம் ஆண்டு இந்தியாவுக்கு திரும்பியதாக பொன்.மாணிக்கவேல் சொல்லிய சிலைகளை, 2007ஆம் ஆண்டு ஆய்வாளர்கள் ஜீவானந்தம் & காதர் பாட்சா குழுவினர் அதிகாரப்பூர்வமாக மீட்டு 2008ஆம் ஆண்டே தீனதயாளன் மீது குற்றப்பத்திரிக்கையை தாக்கல் செய்துள்ளனர்.

கடத்தல் கும்பல் தலைவன் தீனதயாளன், 2007ஆம் ஆண்டு தன்னை கைது செய்த அதிகாரிகளுக்கு எதிராக அதுவும் இறுதி விசாரணை அறிக்கை தாக்கல் செய்யப்பட்டு ஒரு வழக்கில், சம்பவ,ம் நடைபெற்ற 12 ஆண்டுகளுக்கு பின்னர் 2017ஆம் ஆண்டு ஒரு குற்றச்சாட்டை வாக்குமூலமாக கொடுக்கிறார். அதனை ஏற்று தீனதயாளனை அனைத்து குற்றங்களிலிருந்து விடுவித்து ‘அப்ரூவராக’ அறிவித்து தப்பிக்க வைத்துள்ளார் பொன்.மாணிக்கவேல். இந்த நபர் தான் நீதிமன்றங்கள் கொண்டாடும் யோக்கிய சிகாமணி!

தீனதயாளன்

இந்த கதை அவ்வளவு வலுவானதாக இல்லை என்று பொன்.மாணிக்கவேலுவுக்கு தோன்றியதால் என்னவோ, இன்னொரு ஜோடிக்கப்பட்ட வழக்கை டி.எஸ்.பி. காதர் பாட்சா மீது பதிவு செய்கிறார்.

2007ஆம் ஆண்டு அருப்புக்கோட்டைக்கு பக்கத்தில் விவசாய நிலத்தில் சிவன், பார்வதி மற்றும் சிவகாமி என மூன்று சிலைகள் அந்த நிலத்தின் உரிமையாளர்களால் கண்டெடுக்கப்படுகின்றன. அவர்கள் கிறிஸ்தவ சமயத்தை சேர்ந்தவர்களாக இருந்ததால், அந்த சிலைகளை ஒரு போட்டோகிராபர் கொண்டு படமெடுத்துவிட்டு தங்கள் ஷெட்டிலேயே வைத்து விடுகின்றனர்.

2008ஆம் ஆண்டு இந்த மூன்று சிலைகளையும் விலை கொடுத்து வாங்குகிறோம் என்ற பெயரில் அவற்றை மீட்க ரகசியமாக சென்ற டிஎஸ்பி காதர் பாட்சா தலைமையிலான போலீசார், சிலைகளை கண்டெடுத்த நிலத்தின் உரிமையாளர்களை துப்பாக்கி முனையில் மிரட்டி அவற்றை கொள்ளையடித்துவிட்டதாக வழக்கு. இதுவரை பொன்.மாணிக்கவேல் சொல்வது ஓரளவு நம்பும்படியாக இருக்கும். 

அடுத்து அவர் எழுதிய திரைக்கதை தான் டிவிஸ்ட்...

இந்த மூன்று சிலைகளையும் கடத்திய டிஎஸ்பி காதர்பாட்சா அவற்றை சிலை கடத்தல் தலைவன் தீனதயாளனிடம் 15 லட்சத்துக்கு விற்றுவிட்டாராம். அதுவும் தீனதயாளன் அவற்றை வாங்க மறுத்தபோதும், வலுக்கட்டாயமாக அவரது காரில் காதர் பாட்சா வைத்துவிட்டு சென்றாராம். அந்த சிலைகளில் இரண்டை டெல்லியை சேர்ந்த ஒருவரிடம் 20 லட்சத்துக்கு விற்றுவிட்டார் தீனதயாளன்.

சரி, இவ்வளவு பயங்கரமான குற்றச் சம்பவம் எப்படி சிலை கடத்தல் தடுப்பு பிரிவுக்கு தெரிய வந்தது?

2016ஆம் ஆண்டு சிலை கடத்தல் தடுப்பு பிரிவு தலைவருக்கு வந்த அனாமதேய மர்ம கடிதத்ததில் தான் இந்த குற்றச்சாட்டுகள் சொல்லப்பட்டிருந்தது. அதுவும் 2008ஆம் ஆண்டு கடிதம் எழுதிய நபர் சிலை கடத்தல் தடுப்பு பிரிவில் பணிபுரிந்ததாகவும் கடித்தத்தில் சொல்கிறார். 

அடடா இப்படி ஒரு ‘தெளிவான’ ‘விரிவான’ மர்ம கடிதத்தை நாம் எங்கேயாவது பார்த்திருப்போமா?

இந்த ஜோடிக்கப்பட்ட வழக்குகளில் தான் டிஎஸ்பி காதர்பாட்சாவை அடுத்தடுத்து கைது செய்து 90 நாட்கள் பிணையை மறுத்து சிறையில் அடைத்தார் பொன்.மாணிக்கவேல்.

சர்வதேச கடத்தல் கும்பலை சேர்ந்த சுபாஷ் கபூரை தாம் தான் ஜெர்மனியிலிருந்து இந்தியாவுக்கு நாடு கடத்தி கொண்டு வந்தேன் என்று ஊடகங்களிடம் புலிகேசி மீசையை தடவியபடி பெருமை பேசுவார் பொன்.மாணிக்கவேல். ஆனால் உண்மையில் நடந்தது என்னவென்றால் தீனதயாளனை அப்ரூவர் என்று சொல்லி தப்பிக்கவிட்டதை போல, சுபாஷ் கபூரிடமும் கூட்டு சேர்ந்து அவர் மீதான வழக்குகளை திரும்ப பெற்றார் பொன்.மாணிக்கவேல்.

சுபாஷ் கபூர்

பல்வேறு கடத்தல் வழக்குகளில் தொடர்புடைய சுபாஷ் கபூரை 2012ல் இந்தியாவுக்கு கொண்டு வந்தது சிலை கடத்தல் தடுப்பு பிரிவு. ஜெர்மனியிலிருந்து நாடு கடத்தப்பட்டதால், சுபாஷ் கபூரை கைது செய்யவோ, வழக்கில் குற்றப்பத்திரிகை தாக்கல் செய்யவோ எந்த தடையும் இல்லை. ஆனால் வழக்கு விசாரணைக்கு மட்டும் ஜெர்மன் அரசின் அனுமதி வேண்டும். அதனால் அவன் மீது குற்றப்பத்திரிகை மட்டும் இப்போதைக்கு தாக்கல் செய்யலாம் என்று 2017ஆம் ஆண்டு பழவூர் வழக்கில் கூடுதல் விசாரணை அறிக்கையை தாக்கல் செய்யும்போது தெரிவித்தார் பொன்.மாணிக்கவேல். இதனை அரசு வழக்கறிஞரின் சட்ட ஆலோசனை பெற்று தாக்கல் செய்வதாக நீதிமன்றத்தில் தெரிவித்தார்.

ஆனால் இரண்டு வருடங்களுக்கு பிறகு நீதிமன்றத்தில் அந்தர் பல்டி அடித்தார் பொன்.மாணிக்கவேல். அதாவது சுபாஷ் கபூர் மீதான வழக்குகளை காரணம் காட்டி ஜெர்மன் அரசு இந்திய அரசுடனான மற்ற நாடு கடத்தல் விவகாரங்களில் பிரச்சினை உருவாக்குவதாகவும், இதனால் இரு நாடுகளுக்கிடையிலான உறவில் சிக்கல் எழுவதாகவும், அதன் காரணமாக தமிழ்நாடு அரசு இந்திய நாட்டின் வெளியுறவு கொள்கைக்கு பாதிப்பு ஏற்படாதவாறு சுபாஷ் கபூர் மீதான பழவூர் மற்றும் விக்ரமங்கலம் வழக்குகளை திரும்ப பெறுவதாக அரசாணை வெளியிட வேண்டும் என்று தமிழ்நாடு அரசுக்கு 'அறிவுறுத்தினார்'. 

மற்ற கடத்தல் வழக்குகளில் 10 ஆண்டுகள் தண்டனை பெற்ற சுபாஷ் கபூர் 2022ஆம் ஆண்டே தண்டனை காலம் முடிந்து இன்னும் சிறையில் உள்ளார். அவரை தங்கள் நாடுகளில் உள்ள வழக்குகளுக்கு நாடு கடத்த வேண்டும் என்று கோரி வருகிறது அமெரிக்காவும், ஜெர்மனியும். தண்டனையின் ஒரு பகுதியான அபராத தொகையை கட்டாமல் இந்திய சிறையிலேயே காலம் கடத்தி வருகிறார். 600 கோடி அளவுக்கு சிலைகளை கடத்தியதாக சுபாஷ் கபூர் மீது பொன்.மாணிக்கவேல் குற்றச்சாட்டு வைத்தார். ஆனால் யோக்கிய சிகாமணி பொன்.மானிக்கவேலுவின் அதிரடியால் வெறும் 10 ஆண்டு சிறை தண்டனையோடு தப்பவிடப்பட்டார்.

சிலை கடத்தல் கும்பல் தலைவர் தீனதயாளனுடன் கூட்டு சேர்ந்து, அவனை தப்பிக்க வைத்ததுடன், அவனிடமிருந்தே வாக்குமூலம் பெற்று பொன்.மாணிக்கவேல் தமக்கு இழைத்த கொடுமைகளை பட்டியலிட்டு 2019ஆம் ஆண்டு நடவடிக்கை எடுக்க கோரினார் காதர் பாட்சா. இது தொடர்பாக சிபிசிஐடி போன்ற தமிழ்நாடு காவல்துறையின் தனிப்பிரிவு ஏதேனும் விசாரிக்க உத்தரவிடக்கோரி காதர் பாட்சா தொடுத்த வழக்கில் 2022ஆம் ஆண்டு சென்னை உயர்நீதிமன்றம் உத்தரவு பிறப்பித்தது.

காதர் பாட்சா சிபிசிஐடி விசாரணை தான் கோரினார், ஆனால் வழக்கை விசாரித்த நீதியரசர் ஜெயச்சந்திரன் தனது 76 பக்க தீர்ப்பில் சிபிஐ விசாரணைக்கு உத்தரவிட்டார். அதில் காதர் பாட்சா அளித்த புகார் மனுவை விசாரிப்பது மட்டுமல்லாமல், 2005ஆம் ஆண்டு பழவூர் வழக்கிலும் ஏதேனும் தவறு நடந்திருப்பது கண்டறியப்பட்டால், அதிலும் தனியே சட்டரீதியாக நடவடிக்கை எடுக்கவும் அறிவுறுத்தியுள்ளார்.

நீதியரசர் ஜெயச்சந்திரன் தீர்ப்பு

நான் மேலே விவரித்த தகவல்கள் அனைத்தும் நீதியரசர் ஜெயச்சந்திரன் அவர்களின் தீர்ப்பிலும் விரிவாக விவாதிக்கப்பட்டுள்ளது. அதில் யோக்கிய சிகாமணி பொன்.மாணிக்கவேல் செயல்பாடுகளை அக்குவேறு ஆணிவேறாக பிரித்துள்ளார் நீதிபதி. அது எந்த அளவிற்கு இருக்கிறதென்றால், நீதிபதி ஜெயச்சந்திரனின் தீர்ப்பில் தம்மை பற்றி கூறப்பட்டுள்ளவற்றை நீக்கக்கோரி உச்சநீதிமன்றம் சென்றார் பொன்.மாணிக்கவேல். உச்சநீதிமன்றமோ அவரது கோரிக்கையை பரிசீலனை செய்து, சட்டத்துக்குட்பட்டு நடவடிக்கை எடுக்க வேண்டும் என்று மட்டுமே அறிவுறுத்தியது. மேலும், தன் மீதான சிபிஐ விசாரணைக்கு தடை கேட்ட மனுவையும் தள்ளுபடி செய்து நீதியரசர் ஜெயச்சந்திரனின் தீர்ப்பை உறுதி செய்தது உச்சநீதிமன்றம்.

2022ஆம் ஆண்டு உயர்நீதிமன்ற உத்தரவை தொடர்ந்து, பல தடைகளை தாண்டி காதர் பாட்சாவின் புகாரை விசாரித்த சிபிஐ., கடந்த ஆண்டுஆகஸ்ட் மாதம் 8ஆம் தேதி பொன்.மாணிக்கவேல் மீது முதல் தகவல் அறிக்கையை பதிவு செய்தது. அதில் பொன்.மாணிக்கவேலுவுக்கு எதிரான காதர்பாட்சாவின் குற்றச்சாட்டுக் அடிப்படை முகாந்திரம் இருப்பதாகவும், பொய்யான கிரிமினல் வழக்கை டிஎஸ்பி காதர் பாட்சா மீது பதிவு செய்து, சட்டவிரோதமாக அவரை கைது செய்ததாகவும், பொய் குற்றச்சாட்டுகளை முன்வைக்க போலி ஆவணங்களை தயாரித்ததாகவும் மொத்தம் 13 பிரிவுகளில் சிபிஐ வழக்கு பதிவு செய்தது. மேலும், அவரது இல்லத்திலும் சிபிஐ அதிகாரிகள் சோதனை மேற்கொண்டனர்.

பொன்.மாணிக்கவேலுவை கைது செய்வதற்கு சிபிஐ முனைப்பு காட்டியபோது, உயர்நீதிமன்ற மதுரைக் கிளையில் முன்பிணை பெற்று தப்பித்தார்.

சிபிஐ எப்.ஐ.ஆர் நகல்

முன்பிணை தொடர்பான வழக்கு விசாரணையின் போது, பொன்.மாணிக்கவேல் மீதான குற்றச்சாட்டுக்கு முகாந்திரம் இருப்பதால் வழக்கு பதிவு செய்யப்பட்டுள்ளது. பொன். மாணிக்கவேலை கைது செய்து காவலில் எடுத்து விசாரித்தால் தான், அவருக்கும் சிலை கடத்தல் மன்னன் சுபாஷ் கபூருக்கும் உள்ள தொடர்பு குறித்து தெரிய வரும். எனவே முன்பிணை வழங்கக்கூடாது’ என்றும், ’உயர் நீதிமன்ற உத்தரவுபடியே பொன். மாணிக்கவேல் மீது வழக்கு பதிவு செய்யப்பட்டுள்ளது’ என்றும் சிபிஐ தரப்பில் வாதிடப்பட்டது.

சிபிஐயின் பிடி இறுகி வந்த நிலையில், மதுரை மாவட்ட அமர்வு நீதிமன்றத்தில் சிபிஐ தாக்கல் செய்த விசாரணை நகலை கேட்டு தாக்கல் செய்தார் பொன்.மாணிக்கவேல். மற்ற ஆவணங்கள் தந்தால் விசாரணை பாதிக்கப்படும், முதல் தகவல் அறிக்கை மட்டுமே பகிர முடியும் என்று நீதிபதி உத்தரவிட, அதை எதிர்த்து உயர்நீதிமன்ற மதுரை கிளையில் வழக்கு தொடுத்தார். நீதிபதி பி.புகழேந்தி வழக்கை விசாரித்து வந்தார்.

நிபந்தனை பிணையில் உள்ள பொன்.மாணிக்கவேல் சாட்சிகளை மிரட்டி வருகிறார். இதனால் அவருக்கு வழங்கப்பட்ட முன்பிணையை ரத்து செய்வதற்கான நடவடிக்கை தொடங்கியுள்ளோம் என்று நீதிமன்றத்தில் தெரிவித்தது சிபிஐ. மேலும், குற்றச்சாட்டில் முகாந்திரம் இருப்பதாலேயே வழக்கு பதிந்ததாகவும், கடத்தல்காரன் சுபாஷ் கபூரை காப்பாற்றும் நோக்கில் செயல்பட்டுள்ளார்’ என்றும் வாதிட்டது.

’நீதிமன்றத்தால் சிறப்பு விசாரணை அதிகாரியாக நியமிக்கப்பட்டவர் மீது எந்த அடிப்படையில் வழக்குப் பதிவு செய்தீர்கள்? பொன்.மாணிக்கவேல் போன்ற ஓய்வுபெற்ற காவல் துறை உயர் அதிகாரிகள் மீது வழக்குகள் பதிவு செய்து, கைது செய்து விசாரிப்பது சரியா? குற்றம் சாட்டப்பட்ட நபரின் பேச்சைக் கேட்டு, இவ்வாறு வழக்குப் பதிவு செய்தால், முக்கிய வழக்குகளை விசாரிக்க, காவல் துறை உயர் அதிகாரிகள் எவ்வாறு முன்வருவர்? என பல அதிரடி கேள்விகளை எழுப்பிய நீதிபதி, ’முறையாக பணியாற்றும் அலுவலர்களை பாதுகாக்க வேண்டும். முறையான விவரங்கள் இன்றி பதிவு செய்யப்பட்டுள்ள இந்த வழக்கு விசாரணைக்கு உகந்தது அல்ல’ என்று கடந்த 13.3.25 சிபிஐ விசாரணைக்கு தடை விதித்துள்ளார்.

சாத்தான்கள் வேதம் ஓதும் நாட்டில், மக்களே சிறந்த நீதிபதிகள்!

டிஎஸ்பி காதர் பாட்சாவுக்கு நிச்சயம் நீதி கிடைக்க வேண்டும்!

ஆர்.எஸ்.எஸ். கும்பலின் அடியாள் பொன்.மாணிக்கவேல் இன்னும் எவ்வளவு காலம் சட்டத்தின் பிடியில் இருந்து தப்பிப்பார் என்று நாமும் பொறுத்திருந்து பார்ப்போம்.

- வன்னி அரசு

நன்றி : நக்கீரன்

(மார்ச் 22 & 26 தேதியிட்ட நக்கீரன் இதழில் இரண்டு பாகமாக இந்த கட்டுரை வெளியானது)

தலைவர் பிரபாகரனுக்கு துரோகம் செய்யும் சீமான்!

 தமிழீழ விடுதலைப்புலிகள் கட்டுப்பாட்டில் இருந்த முல்லைத்தீவில் கடந்த 2005ஆம் ஆண்டு மாவீரர் நிகழ்வில் பங்கேற்கும் வாய்ப்பு கிடைத்தது. கிளிநொச்சியில் நான் தங்கியிருந்த ‘வன்னி வேளாண்’ அலுவலகத்தில் காத்திருந்தேன்.

‘நிதர்சனம்’ பொறுப்பாளரும் தமிழீழ விடுதலைப்புலிகளின் ஊடகப் பொறுப்பாளருமான சேரலாதன் மற்றும் கடல் புலிகள் பொறுப்பாளர்கள் சிலர் என்னை அழைத்துப் போக வந்திருந்தனர். புலிகளின் வாகனம் முல்லைத்தீவை நோக்கி சீறியது. துவக்குகளை சுமந்த போராளிகளுடன் நானும் பயணப்பட்டேன். முல்லைத்தீவு கடற்கரையில் மாலையில் ஒருங்கிணைக்கப்பட்டிருந்த மாவீரர்களுக்கான அந்த நிகழ்வில் பங்கேற்க கடல் புலிகளின் தளபதி சூசை அவர்கள் அழைப்பு விடுத்திருந்தார்.அதற்காகத்தான் விரைந்தோம்.

முல்லைத்தீவு கடற்கரையில் மதிய உணவுக்காக மரத்தடி நிழல் ஒன்றில் எல்லோரும் ஒதுங்கினோம். கேணல் சேரலாதனுடன் துவக்கு ஏந்திய போராளிகள் உணவுப் பொட்டலங்களுடன் வந்தமர்ந்தனர். இறைச்சி உணவு தான். ஆமைக்கறி எல்லாம் இல்லை. சாப்பிட்டுக்கொண்டு இருக்கும் போதே, ஒரு பெரியவர் நல்ல போதையுடன் எங்களருகே வந்து, “என்னடா தம்பி இந்த துவக்கு வெடிக்குமா?” “எத்தன ஆமிக்காரன சுட்டிருக்க?” என சீண்டினார். போராளிகள் அதிக பொறுமையுடன் கடந்து வந்து வாகனத்தில் ஏறினர். நானும் ஏறினேன். அப்போதும் வாகனத்தை பின்தொடர்ந்து வந்து போராளிகளை சீண்டினார் அந்த போதை மனிதர்.

எனக்கே பயங்கர கோபம் வந்து, “என்ன இப்படி கிண்டலடிக்கிறார்.. அமைதியாக வர்றீங்க.. ஒரு அறை கொடுக்க வேண்டியது தானே?” என கோபத்துடன் கேட்டேன். அப்போது, “இந்த துவக்கு சிங்கள ஆமிய சுடுறதுக்கு தான் பயன்படுத்தனுமே தவிர, அப்பாவிகளை அச்சுறுத்த தொடக்கூடாது என்று உறுதி அளித்து தான் எங்களிடம் இந்த துவக்குகளை கையளித்தார் தலைவர்” என போராளிகள் பதில் அளித்தனர்.

விடுதலைப்புலிகளின் ஒவ்வொரு தாக்குதலும் ராணுவ நிலைகளின் மீது தான் இருந்ததே தவிர அப்பாவி சிங்கள மக்கள் மீதல்ல. 2001 ஆண்டு உலகமே அதிர்ச்சியுடன் திரும்பி பார்த்த கொழும்பு-கட்டுநாயக விமானத் தாக்குதலாக இருக்கட்டும், இறுதியாக 2008 ஆம் ஆண்டு நடைப்பெற்ற விடுதலைப்புலிகளின் வான் புலிகள் தாக்குதலாக இருக்குட்டும்  எல்லாமே சிங்கள ராணுவ நிலைகளை குறிவைத்தே தொடுக்கப்பட்டதாகும். ஆனால், தமிழ்நாட்டில் ஓர் அரசியல் கட்சியின் தலைவராக செயல்பட்டு வரும் சீமான், ஈரோடு இடைத்தேர்தல் பரப்புரைக் கூட்டத்தில், “ என்னிடம் பிரபாகரன் கொடுத்த வெடிகுண்டு இருக்கு. உன்னிடம் இருக்கும் பெரியாரின் வெங்காயத்தை வீசு, நான் வெடிகுண்டை வீசுகிறேன். என்ன்வாகும்? புல்,பூண்டு கூட இருக்காது” என வன்முறையை தூண்டும் விதமாக பேசியுள்ளார்.

விடுதலைப்புலிகளின் எந்த ஆயுதமும் அப்பாவி மக்கள் மீது பயன்படுத்தக்கூடாது என்பது தான் விடுதலைப்புலிகளின் தலைவர் பேதகு பிரபாகரன் அவர்களின் நிலைப்பாடு. இதுவரை அப்படித்தான் செயல்பட்டு வந்துள்ளனர். ஆனால் சீமானோ விடுதலைப்புலிகளின் வெடிகுண்டை பெரியாரியவாதிகள் மீது வீசுவதாக சொல்வது, மேதகு பிரபாகரன் கொள்கைக்கும் நிலைப்பாட்டுக்கும் எதிரானது இல்லையா?

தமிழ்நாட்டில் விடுதலைப்புலிகளின் ஆதரவும், தமிழீழ விடுதலைக்கான ஆதரவும் இன்னமும் இளைஞர்களிடையே நீறுபூத்த நெருப்பாக இருப்பதற்கு காரணம் திராவிட இயக்கங்களும், திராவிட கருத்தியலை சுமந்து களமாடும் விடுதலைச்சிறுத்தைகள்  போன்ற இயக்கத்தினராலும் தான்.

2002ஆம் ஆண்டு ஜெயலலிதா முதல்வராக இருந்த காலத்தில் தான் வைகோ, பழ.நெடுமாறன், சுபவீ, கொளத்தூர் மணி, சாகுல் அமீது போன்ற விடுதலைப்புலிகள் ஆதரவாளர்கள் ‘பொடா’ சட்டத்தில் கைது செய்யப்பட்டனர். அதே காலகட்டத்தில் தான் நக்கீரன் ஆசிரியர் கோபால் ‘பொடா’ சட்டத்தில் சிறைபடுத்தப்பட்டார். இந்த தலைவர்கள் அமைத்து கொடுத்த மேடையேறியதால் தான் எந்தவித களச்செயல்பாடும் இல்லாத சீமான் எனும் நபர் உலகுக்கு அறிமுகமானார். இப்படி விடுதலைப்புலிகள் ஆதரவாளர்களை வேட்டையாடிய ஜெயலலிதாவை ஆதரித்து “இலை மலர்ந்தால் ஈழம் மலரும்” என 2011ஆம் ஆண்டு சட்டமன்ற தேர்தல் பரப்புரையில் ஈடுபட்டவர் தான் சீமான்.

திமுகவுக்கும் அதிமுகவுக்கும் மாற்றாக அரசியல் செய்வதாக சொல்லி வந்தாலும், முழுக்க முழுக்க திமுக எதிர்ப்பும், கருணாநிதி வெறுப்புமே இருந்தது. அதன் தொடர்ச்சியாக இன்றைக்கு உச்சகட்டமாக தந்தை பெரியார் வெறுப்பை உமிழ்ந்து வருகிறார்.

தந்தை பெரியாரின் அரசியல் என்பது முழுக்க தமிழ் - தமிழர் - தனித்தமிழ்நாடு என அமைந்தது. பார்ப்பனியத்தின் ஆதிக்கத்தை உடைக்க திராவிட அரசியலை கூர்மைப்படுத்தினார். ஆரியத்தின் பகையை வீழ்த்த திராவிடத்தை ஆயுதமாகவும் கேடயமாகவும் முன்னிறுத்தினார். திராவிடத்தையும் தந்தை பெரியாரையும் வீழ்த்த பல வழிகளில் ஆரியம் பல பத்தாண்டுகளாக முயற்சித்தது. அத்தனையும் தோற்றுப் போனது. இப்போது சீமானை தூண்டி முயற்சிக்கிறது.

ஆரியமா? திராவிடமா? எனும் இனப்போரை மடை மாற்றி திராவிடமா? தமிழ்த்தேசியமா? என தமிழர்களுக்குள்ளேயே வன்முறையை நடத்த RSS போன்ற வலதுசாரிகள் தூண்டிவிட்டதன் விளைவு பெரியாரிய - திராவிட வெறுப்பு அரசியலை முன்னெடுத்து வருகிறார் சீமான்.

பாஜக ஆட்சி அதிகாரத்துக்கு வந்தது முதல் இந்தியாவின் அடையாளமான மதச்சார்பின்மை, சகோதரத்துவம், சனநாயகம் மற்றும் தேசிய இனங்களின் அடையாளங்களை அழித்தொழிக்கவே முயற்சித்து வருகிறது. இந்துத்துவத்தின் முகமான சாவர்க்கர் போன்றோரின் இலக்கு இந்து ராஷ்டிரம் தான். இந்து ராஷ்டிரத்திற்க்கு தடையாக இருப்பது மதச்சார்பின்மையும் தேசிய இனங்களின் எழுச்சியும் தான். ஆகவே தான் பாஜக மதச்சார்பின்மை கோட்பாட்டை அழித்துவிட்டு மதவழி தேசியத்தை நிறுவ முயலுகிறது. மதவழி என்பது இந்து தேசியம் தான். இந்து தேசியத்திற்கு தடையாக இருப்பது இந்தியாவின் தேசிய இனங்களின் அடையாளமும், அதன் அரசியல் எழுச்சியும் தான்.

காஷ்மீரிகளின் தேசிய இன அடையாளத்தையும் அதன் எழுச்சியையும் சிதைக்கும் உத்தியே 370 ரத்தாகும். அதே போல, வடகிழக்கு மாநிலங்களின் தேசிய இன எழுச்சியை ராணுவத்தின் மூலம் ஒடுக்கி மத அரசியலை முன்னெடுத்து வருகிறது பாஜக. இந்தியா முழுக்க தேசிய இனங்களின் அடையாளங்களை அழித்துவிட்டு இந்து தேசியத்தை கட்டமைக்கும் முயற்சியில் பாஜக உள்ளிட்ட சங்கபரிவார அமைப்புகள் முன்னெடுப்பதை தடுக்கும் விதமாக அந்தந்த மாநிலங்களில், மாநில உரிமைகளை பேசக்கூடிய அமைப்புகள், கட்சிகள் தீவிரமாகிக்கொண்டு இருக்கின்றன.

தமிழ்நாட்டில் திராவிட இயக்கங்கள் தேசிய இனத்தின் அடையாளமான 'தமிழர்' உரிமைகளை காத்து வந்துள்ளன. இத்தகைய அரசியல் வலிமையை அழித்தொழிக்க பாஜக போன்ற இந்துத்துவ அமைப்புகள், தமிழ்த்தேசியத்தின் பெயரில் நாம் தமிழர் கட்சியை உருவாக்கியது. வடக்கே ராமரை வைத்து அரசியல் செய்து வெற்றி பெற்றது போல, தமிழ்நாட்டில் முப்பாட்டன் முருகன் என முன்னிறுத்தி மதவாத அரசியல் செய்ய செயல் திட்டம் வகுக்கப்பட்டது.

அதன்படி தான் இன்றைக்கு நாம் தமிழர் கட்சி செயல்பட்டு வருவதை பார்க்கலாம். சமீபத்தில் திருப்பரங்குன்றத்தில் பாஜக முன்னெடுக்கும் கந்தர் மலை அரசியலும் அதன் தொடர்ச்சியே!

தமிழ்த்தேசியத்தின் முதன்மை எதிரி இந்திய தேசியம் தான். தெலுங்கு தேசியமோ கன்னட தேசியமோ இருக்க முடியாது. ஆனால் சீமான் இந்திய தேசியத்தை எதிர்க்காமல் தெலுங்கு - கன்னட மக்களை எதிர்ப்பது பாஜகவின் மடைமாற்றும் உத்தி தான். இந்து - இந்தியத்தை பாதுகாப்பதற்காக உருவாக்கப்பட்ட போலி தமிழ்த்தேசிய அமைப்பு தான் நாம் தமிழர் கட்சி.

மேதகு பிரபாகரன் பவுத்த சிங்கள பேரினவாதத்துக்கு எதிராகவே சமரசமில்லாமல் களமாடி வந்தார். 'பவுத்த' சிங்கள பேரினவாதத்துக்கு எதிராக 'இந்து' அடையாளத்தை ஒருபோதும் முன்னிறுத்தியதில்லை. தமிழ்த்தேசிய அரசியலையே தீவிரப்படுத்தினார். இந்தியாவில் பால்தாக்கரே போன்ற இந்துத்துவவாதிகள் பிரபாகரனை இந்து என்று ஆதரித்தபோது கூட, தன்னை ஒரு போதும் இந்துத்துவ அரசியலோடு அடையாளப்படுத்திக் கொண்டதில்லை. ஆனால், மேதகு பிரபாகரன் பெயரை பயன்படுத்திக் கொண்டு இந்துத்துவ அரசியலை சீமான் முன்னெடுப்பது பிரபாகரனுக்கு செய்யக்கூடிய துரோகம் மட்டுமல்ல, தமிழ்த்தேசிய அரசியலுக்கு செய்யக்கூடிய துரோகமாகும்!

உண்மையான தமிழ்த்தேசியமென்பது சாதி ஒழிப்பை முன்னிறுத்துவதாகும். சாதி ஒழித்தல் ஒன்று நல்ல தமிழ் வளர்த்தல் மற்றொன்று என தமிழ்த்தேசியத்திற்கு வழிகாட்டியவர் புரட்சிக்கவிஞர் பாரதிதாசன். ஆனால், சீமானோ குடிபெருமை எனும் பெயரில் சாதி ஆணவப்படுகொலைகளை ஆதரிப்பது எனும் சாதியவாத அரசியலை வளர்த்தெடுத்து வருகிறார். அதாவது, சாதியத்தையும் மதவாதத்தையும் இந்துத்துவத்தின் பெயரால் எப்படி பாஜக நிறுவனப்படுத்த முயலுகிறதோ, அதே உத்தியை தமிழ்த்தேசியத்தின் பெயரால் சீமான் நிறுவ முயலுகிறார்.

இது தமிழ்நாட்டில் ஓரு போதும் நடக்காது.

இளைஞர்களும் பெண்களும் சீமானிடம் எச்சரிக்கையாக இருப்பது நல்லது.

- வன்னி அரசு

நன்றி : நக்கீரன்
(12.02.25 தேதியிட்ட நக்கீரன் இதழில் இந்த கட்டுரை வெளியானது)