உமர் காலித் உள்ளிட்ட 9 பேருக்கு பிணை மறுப்பு - காவி பாசிசத்தின் பிடியில் இந்திய நீதித்துறை!

புரட்சியாளர் அம்பேத்கர் வகுத்தளித்த இந்திய அரசியலமைப்பின் அடிப்படை கூறுகளில் ஒன்றான மதச்சார்பின்மையை நீர்த்து போகச்செய்யும் ஆர்.எஸ்.எஸ். சங்க பரிவார் கும்பலின் தொடர் முயற்சிகளில் ஒன்றாக குடியுரிமை திருத்த சட்டத்தை கொண்டு வந்தது மோடி அரசு.

கடந்த 2019 திசம்பரில் குடியுரிமை திருத்த சட்டம் பாராளுமன்றத்தில் அறிமுகப்படுத்தப்பட்ட காலகட்டத்தில், இஸ்லாமியர்களின் பங்கேற்புடன் சனநாயக சக்திகள் போராட்டங்களை முன்னெடுத்தனர். தில்லி ஷாஹீன் பாக் போராட்டக் களம் நாடெங்கும் எதிரொலித்தது. அரசின் அடக்குமுறை - ஊடக இருட்டடிப்பு, இஸ்லாமிய வெறுப்பு பரப்புரை என அனைத்தையும் இஸ்லாமிய பெண்கள் துணிவுடன் எதிர்கொண்டனர்.

டெல்லி கலவரமும் எப்.ஐ.ஆர். எண் 59 ம் 

தலைநகர் தில்லியில் பல இடங்களில் மிக வீரியமாக நடைபெற்றவந்த போராட்டத்தில், அரசின் ஆதரவோடு வன்முறையை அரங்கேற்றி சங்க பரிவார கும்பல்  போராட்டத்தை முடிவுக்கு கொண்டு வந்தது. கடந்த 2020ஆம் ஆண்டு பிப். 22 -24 ஆகிய நாட்களில் இஸ்லாமியர்கள் அடர்த்தியாக வாழும் பகுதிகள் தாக்கப்பட்டன, அவர்களின் வீடுகள், வணிக வளாகங்கள் தீக்கிரையாக்கப்பட்டன. ஆயிரக்கணக்கான இஸ்லாமியர்கள் வீடுகளை விட்டு வெளியேறி நிவாரண முகாம்களில் தஞ்சமடைந்தனர். 

குடியுரிமை திருத்த சட்டத்துக்கு எதிரான போராட்ட பின்னணியில் அரங்கேறிய வன்முறை சம்பவத்தில் ஆயிரக்கணக்கான இஸ்லாமியர்கள் மீது நூற்றுக்கணக்கான வழக்குகள் பதிவு செய்யப்பட்டன. அதில் மிகவும் முக்கியமானதாக கருதப்படும் வழக்கு தான் எப்.ஐ.ஆர். 59/2020.

கடந்த 2020 பிப்ரவரியில் தில்லியில் வன்முறை நடைபெற்ற காலகட்டத்தில் 24மற்றும் 25 ஆகிய தேதிகளில் அமெரிக்க அதிபர் டொனால்டு ட்ரம்ப் இந்தியாவில் சுற்றுப்பயணம் மேற்கொண்டிருந்தார். 2019 திசம்பரிலிருந்து குடியுரிமை திருத்த சட்டத்துக்கு எதிரான போராட்டம் நடைபெற்று வந்தாலும், ட்ரம்பின் வருகையையொட்டி பெருமளவு வன்முறை சம்பவங்களை அரங்கேற்ற போராட்டக்காரர்கள் திட்டமிட்டதாகவும், அதற்காக பல மாதங்களாக சதி ஆலோசனையில் ஈடுபட்டதாகவும், இதன் விளைவாக தான் தில்லி கலவரம் முன்கூட்டியே திட்டமிட்டு அரங்கேற்றப்பட்டதாக வழக்கு பதிவு செய்யப்பட்டது. மேலும் மதரீதியாக நாட்டை துண்டாடும் திட்டமும் இருந்ததாக அரசு சொல்லியது.

தில்லி ஜவஹர்லால் நேரு பல்கலைக்கழகத்தின் மாணவ செயற்பாட்டாளர்கள் ஷர்ஜீல் இமாம் மற்றும் உமர் காலித் ஆகிய இருவரை தில்லி கலவரத்துக்கு மூளையாக செயல்பட்டதாக எப்.ஐ.ஆர். 59 குற்றஞ்சாட்டுகிறது. இந்த இருவருடன் சேர்த்து இந்த வழக்கில் தில்லி ஜவஹர்லால் நேரு பல்கலைக்கழகம் மற்றும் ஜாமியா இஸ்லாமிய பல்கலைக்கழகம் ஆகியவற்றின் மாணவர்கள், சமூக செயற்பாட்டாளர்கள், அரசியல் செயற்பாட்டாளர்கள் என மொத்தம் 18 பேர் ஊபா சட்டத்தின் கீழ் கைது செய்யப்பட்டனர்.

1. தாஹிர் உசேன், 2. உமர் காலித், 3. காலித் சைஃபி, 4. இஷ்ராத் ஜெஹான், 5. மீரான் ஹைதர், 6. குல்ஃபிஷா ஃபாத்திமா, 7. ஷர்ஜீல் இமாம், 8. ஃபைசான் கான், 9. ஷடாப் அஹமத், 10. தஸ்லீம் அஹமத், 11. சலீம் மாலிக், 12. முகமது சலீம் கான், 13. அதார் கான், 14. சஃபூரா சார்கார், 15. ஷிஃபா-உர்- ரஹ்மான், 16. ஆசிஃப் இக்பால் தன்ஹா, 17. நடாஷா நர்வால், 18. தேவங்கனா கலிடா ஆகியோரை கைது செய்து சிறைப்படுத்தியது.

சாலையோர கடையில் மொபைல் சிம் விற்று வந்த ஃபைசான் கான் என்பவருக்கு 2020ஆம் ஆண்டும், பிஞ்சரா டோட் (கூண்டினை உடைத்தெறிவோம்) எனும் கல்லூரி மாணவிகள் அமைப்பை சேர்ந்த நடாஷா நர்வால் மற்றும் தேவங்கனா கலிடா ஆகியோருக்கு 2021ஆம் ஆண்டும் டெல்லி உயர்நீதிமன்றம் பிணை வழங்கியது. மேலும் ஜாமியா மிலியா பல்கலை மாணவர்களான இக்பால் தன்ஹா, சஃபூரா சர்கார் (கைது செய்யப்படும்போது 3 மாத கர்ப்பிணி), வழக்கறிஞர் இஷ்ராத் ஜெஹான் ஆகியோரும் வழக்கின் தன்மையின் அடிப்படையில் பிணை வழங்கப்பட்டது. 

எப்.ஐ.ஆர். 59 வழக்கில் கைது செய்யப்பட்ட 18 பேரில் 6 பேருக்கு 2 ஆண்டுகளிலேயே பிணை கிடைத்தும், மீதமுள்ள 12 பேரும் 5 ஆண்டுகளுக்கும் மேலாக சிறையில் உள்ளனர். இந்த வழக்கில் ஒன்றுக்கும் மேற்பட்ட குற்றப்பத்திரிக்கை தாக்கல் செய்யப்பட்டிருந்தாலும், இதுவரை வழக்கு விசாரணை தொடங்கப்படவில்லை.

உமர் காலித்தின் சட்டப்போராட்டம்

இந்திய நீதித்துறையின் தற்போதைய பரிதாபகர நிலைக்கான சாட்சியாக மாணவ செயற்பாட்டாளர் உமர் காலித் பிணை வழக்கு அமைந்துள்ளது. முதல் பிணை மனுவை விசாரணை நீதிமன்றம் 2022ல் தள்ளுபடி செய்தது. இதனை தொடர்ந்து உச்சநீதிமன்றத்தில் தொடரப்பட்ட சிறப்பு பிணை மனு மீதான விசாரணை கிட்டத்தட்ட 14 மாதங்களில் 14 முறை ஒத்திவைக்கப்பட்டது. உச்சநீதிமன்றத்தில் 

உமர் காலித்தின் பிணை மனுவை விசாரித்தவர் நீதிபதி பெலா திரிவேதி. இவர் உச்சநீதிமன்ற நீதிபதியாக தேர்வாகும் முன்னர், குஜராத் முதல்வராக மோடி இருந்த காலகட்டத்தில் அம்மாநில அரசின் சட்டத்துறை செயலாளராக இருந்தவர் என்பது குறிப்பிடத்தக்கது.

பீமா கொரேகான் வழக்கில் மகேஷ் ராவத் எனும் செயற்பாட்டாளருக்கு மும்பை உயர்நீதிமன்றம் வழங்கிய பிணையை நிறுத்தி வைத்தவர் நீதிபதி பெலா. பிணை கிடைத்தும் 2 ஆண்டுகளுக்கும் மேலாக சிறையில் உள்ளார் ராவத். அதே போல, பேராசிரியர் சாய்பாபாவை விடுதலை செய்த உயர்நீதிமன்ற தீர்ப்பை நிறுத்தி வைத்தவர் நீதிபதி பெலா. ஆனால் மறுவிசாரணையில் மீண்டும் அவரை விடுவித்தது மும்பை உயர்நீதிமன்றம். தீர்ப்பு வந்த 7 மாதங்களில் இறந்தே போனார் சாய்பாபா. இதே நீதிபதி தான், டெல்லி உயர்நீதிமன்றத்தில் 3 ஆண்டுகளாக கிடப்பில் உள்ள தங்கள் பிணை மனுவை விரைந்து விசாரிக்க கோரிய ஷர்ஜீல் இமாம் மற்றும் குல்ஃபிஷா ஃபாத்திமா ஆகியோரின் மனுவை தள்ளுபடி செய்தவர்.

’All The Appeals Are Dismissed’

எப்.ஐ.ஆர். 59ன் கீழ் சிறைவைக்கப்பட்டுள்ளவர்கள் பல்வேறு காலகட்டங்களில் விசாரணை நீதிமன்றத்தால் பிணை மறுக்கப்பட்டு, தில்லி உயர்நிதீமன்றத்தில் மேல்முறையீடு செய்தனர். இவ்வழக்கின் தொடக்க காலகட்டத்திலேயே 6 பேர் வழக்கின் தரவுகள் அடிப்படையில் பிணையில் விடுவிக்கப்பட்ட நிலையில், சிறையில் உள்ள 12 பேரில் 9 பேரின் பிணை மனுவை ஒன்றாக விசாரித்தது தில்லி உயர்நீதிமன்றத்தின் நீதிபதிகள் ஷாலிந்தர் கவுர் மற்றும் நவீன் சாவ்லா அமர்வு இந்த 9 பேரின் பிணை மனுக்கள் மீதான விசாரணை பல கட்ட இழுபறிக்கு பின்னர் முடிக்கப்பட்டு கடந்த ஜூலை 9ஆம் தேதி தீர்ப்பு ஒத்திவைக்கப்பட்டது. நீதிபதி ஷாலிந்தர் கவுர் எழுதிய தீர்ப்பு செப். 2ஆம் தேதி வெளியானது. வழக்கு விசாரணைக்கு எடுத்துக்கொள்ளபட்ட சில நொடிகளிலேயே ’All The Appeals Are Dismissed’ என்று அறிவித்தார் நீதிபதி ஷாலிந்தர். பிணை கோரி தாக்கல் செய்த 9 பேரின் மனுக்களையும் தள்ளுபடி செய்தது டெல்லி உயர்நீதிமன்றம். அன்று மாலை 133 பக்கங்கள் கொண்ட தீர்ப்பு நகல் வெளியானது.

‘Bail is the rule; Jail is the exception’ - ’பிணை என்பது விதி, சிறை என்பது விதிவிலக்கு’ - இது தான் உச்சநீதிமன்றத்தில் நாம் அடிக்கடி கேட்கக்கூடிய வரி. பீமா கொரேகான் வழக்கில் பிணை வழங்கப்பட்ட அருண் பெரேரா, வெர்னான் கான்சல்வேஸ் மற்றும் சோமா சென் ஆகியோரது #ஊபா வழக்கிலும், தில்லி முன்னாள் துணை முதல்வர் மணிஷ் சிசோடியா மற்றும் தமிழ்நாடு அமைச்சர் செந்தில் பாலாஜியின் அமலாக்கத்துறை வழக்கிலும் தனிநபர் சுதந்திரத்தை அழுத்தம் திருத்தமாக வலியுறுத்தியது உச்சநீதிமன்றம்.

ஆனால் உமர் காலித், ஷர்ஜீல் இமாம், குல்ஃபிஷா ஃபாத்திமா போன்ற தோழர்களுக்கு ஆதரவாக மேலே குறிப்பிட்டுள்ள வழக்குகளின் தீர்ப்புகளை வழக்கறிஞர்கள் சுட்டிக்காட்டியும், அவற்றை ஏற்க மறுத்துள்ளது உயர்நீதிமன்றம். மேலும், இதே வழக்கில் கைது செய்யப்பட்டு 2021ஆம் ஆண்டிலேயே மூவருக்கு பிணை வழங்கப்பட்டதன் அடிப்படையை இவர்களின் பிணை மனுவுக்கு பொருத்திப்பார்க்க முடியாது என்று சொல்லியுள்ளது நீதிமன்றம்.

அதுமட்டுமில்லாமல் ’3000க்கும் அதிகமான பக்கங்கள் கொண்ட குற்றப்பத்திரிக்கை, 30 ஆயிரத்துக்கும் அதிகமான மின்னணு ஆதாரங்கள், நூற்றுக்கணக்கான சாட்சிகள் என இந்த வழக்கு விசாரணைக்கு வருவதற்கு மேலும் சில ஆண்டுகள் ஆகக்கூடும். ஏற்கனவே விசாரணை எதுவும் தொடங்கப்படாமல் 5 ஆண்டுகளாக சிறையில் உள்ளனர்’ என குற்றஞ்சாட்டப்பட்டவர்கள் தரப்பு வாதத்தை நிராகரித்தது மட்டுமில்லாமல், இத்தகைய பெரிய வழக்கை விசாரணை அமைப்புகள் சிறப்பாக கையாண்டுள்ளதாகவும், வழக்கு அதன்  இயல்பான போக்கில் (‘Natural Pace’) நடைபெறுவதாக நீதிபதி தீர்ப்பில் விளக்கமளித்துள்ளார்.

தில்லி கலவரம் நடைபெற்று 5 ஆண்டுகள் கடந்துவிட்டன. இவ்வழக்கில் கைது செய்யப்பட்டவர்கள் மீது குற்றப்பத்திரிக்கை தாக்கல் செய்யப்பட்டாலும், இன்னும் குற்றச்சாட்டுகள் பதிவு செய்யும் நிலையில் தான் வழக்கு உள்ளது. வழக்கு விசாரணை தொடங்கப்படாமல் வெறும் விசாரணை கைதிகளாகவே 5 ஆண்டுகளை கடந்து சிறை வைக்கப்பட்டுள்ளனர். அவர்களின் பிணை மனுக்கள் 3 ஆண்டுகளாக பல்வேறு நீதிமன்றங்களில் காத்துக் கொண்டிருந்தன. ஆனால் இதை தான் ‘இயல்பான போக்கு’ என்கிறது தில்லி உயர்நீதிமன்றம். உமர் காலித் போன்றவர்களுக்கு மட்டும் சிறை தான் விதி - பிணை என்பது விதிவிலக்கு என்று சொல்கிறது நீதிமன்றம். 

மனிதர்களை அச்சுறுத்தும் நாய்களை கட்டுப்படுத்தும் நோக்கில் கொடுக்கப்பட்ட தீர்ப்பை மறுவிசாரணை செய்ய அடுத்த சில நாட்களில் சிறப்பு அமர்வு அமைத்து, அந்த தீர்ப்பை நிறுத்திவைக்கும் நீதித்துறையை கொண்டது இந்நாடு. இங்கே தான் அரசியலமைப்பை பாதுகாப்பதற்காக போராடியதால் கைது செய்யப்பட்ட இந்நாட்டின் குடிமக்கள், பிணை எதுவும் இல்லாமல் 5 ஆண்டுகள் சிறை வைக்கப்பட்டுள்ள அவலமும் அரங்கேறி வருகிறது.

டெல்லி கலவரத்தை தூண்டிய பாஜக தலைவர்கள்

குடியுரிமை திருத்த சட்டத்துக்கு எதிரான போராட்டத்தின் போது, ‘துரோகிகளை சுட்டுக் கொல்லுங்கள்’ என்று பொதுக்கூட்டத்தில் பேசிய அனுராக் தாகூர் அப்போது நிதியமைச்சகத்தில் இணை அமைச்சர், அடுத்து அமைந்த ஆட்சியில் தகவல் தொடர்பு அமைச்சர் பதவி அவருக்கு கொடுக்கப்பட்டது. அதே போல, ‘போராட்டக்காரர்களை காவல்துறை விரட்டவில்லை என்றால், நாங்களே தெருவில் இறங்குவோம்’ என்று தில்லி வன்முறைக்கு சில மணிநேரம் முன்பு வன்முறைக்கு தூண்டிய கபில் மிஸ்ரா தான் இப்போது தில்லி பாஜக அரசின் சட்டம் மற்றும் நீதித்துறை அமைச்சர். கலவரக்காரர்களான மோடி - அமித்ஷா ஆகியோர் தலைமை வகிக்கும் ஆட்சியில் புனிதர்களா இருப்பார்கள்? கலவரக்காரர்கள் ஆட்சியில், சனநாயகவாதிகள் சிறைக் கொட்டடியில்.

பாசிச பாஜக அரசின் கூலிப்படையாக எதிர்க்கட்சியினரை குறிவைக்கும் அமலாக்கத்துறை, வருமான வரித்துறை, சனநாயக சக்திகளை வேட்டையாடும் விசாரணை அமைப்புகளான சிபிஐ, என்.ஐ.ஏ., குடிமக்களின் வாக்குரிமையை திருடும் தேர்தல் ஆணையம் என இந்த பட்டியலில் நீதிமன்றங்களும் அதன் நீதிபதிகளும் தங்களை இணைந்துக் கொண்டுள்ளனர்.

காவி பாசிசத்திடம் தொலைத்த முதுகெலும்பை கண்டெடுக்குமா நீதித்துறை?காவி பாசிசத்திடமிருந்து சனநாயகத்தை பாதுகாப்பது ஒவ்வொரு சனநாயகவாதிகளின் கடமை. அந்த வகையில், உமர்காலித் உள்ளிட்ட 9 பேரையும் மீட்டெடுக்க மக்கள் மன்றத்தையும் தீவிரப்படுத்துவோம்!

- வன்னி அரசு
துணைப்பொதுச்செயலாளர்
விடுதலைச்சிறுத்தைகள் கட்சி
4.9.2025

அப்பாவி முஸ்லீம்கள் விடுதலை: மும்பை ரயில்களில் குண்டு வைத்தது சனாதன பயங்கரவாதிகளா?

கடந்த 2006, ஜூலை 11ஆம் தேதி மாலை 6.30 மணிக்கு 7 மும்பை புறநகர் ரயில்களின் முதல்நிலை பெட்டிகளில் 7 குண்டுகள் வெடித்தன. இதில் 187 அப்பாவி பொது மக்கள் கொல்லப்பட்டனர், 824 பேர் காயமடைந்தனர். மொத்தம் 13 பேர் மீது ‘தீவிரவாத தடுப்புக் குழு’ (ATS) குற்றச்சாட்டுகளை முன்வைத்தது. மேலும், 15 பேர் தேடப்படும் குற்றவாளிகளாவும், 2 பேர் இறந்துவிட்டதாகவும் அறிவித்தது.

இந்த வழக்கை விசாரித்து வந்த மும்பை சிறப்பு நீதிமன்றம் கடந்த 2015, செப். 30ஆம் தேதி தீர்ப்பளித்தது. அதில், குற்றஞ்சாட்டப்பட்ட 13 பேரில் 5 பேருக்கு தூக்கு தண்டனையும், 7 பேருக்கு ஆயுள் தண்டனையும் விதிக்கப்பட்டது. ஒருவர் மட்டும் விடுதலை செய்யப்பட்டார்.

மும்பை ரயில் குண்டுவெடிப்பு வழக்கில் சிக்கியிருந்த அப்பாவிகள்

தூக்கு தண்டனை விதிக்கப்பட்டவர்கள்:

1. கமல் அன்சாரி
2. முகமது ஃபைசல்
3. குத்புத்தின் சித்திக்
4. நவீத் உசேன்
5. ஆசிப் கான்

ஆயுள் தண்டனை விதிக்கப்பட்டவர்கள்:

1. தன்வீர் அகமது
2. முகமது மஜீத்
3. ஷேக் முகமது
4. முகமது சஜீத்
5. முசாமில் ரகுமான் ஷேக்
6. சுஹைல் மெகமூத்
7. சமீர் அகமது

விடுதலை செய்யப்பட்டவர்: அப்துல் வாஹித் ஷேக்

தூக்கு தண்டனையை உறுதி செய்வதற்கு மும்பை உயர்நீதிமன்றத்தை மராட்டிய அரசு அணுகியது. தண்டனை விதிக்கப்பட்ட தோழர்களும் அதனை எதிர்த்து மேல்முறையீடு செய்தனர். மிகவும் எளிய பின்னணியை சேர்ந்த இவர்களால் வழக்கை மேற்கொண்டு நடத்த முடியாத சூழலில், நூற்றாண்டு பாரம்பரியம் கொண்ட ஜாமியத் உலாமா-இ-இந்த் அமைப்பினர் இவர்களின் மேல்முறையீட்டு வழக்கை எடுத்து நடத்துவதற்கு முன்வந்தனர்.

மராட்டிய அரசால் மேல்முறையீட்டு வழக்கு மிகவும் தாமதமாக நடத்தப்பட்டு வந்ததால், வழக்கை விரைந்து நடத்த இஸ்லாமியர்கள் தரப்பு 2024ஆம் ஆண்டு உயர்நீதிமன்றத்தை அணுகியது. இதனால் நீதிபதிகள் அணில் கிலோர் & சந்தக் ஆகியோரை கொண்ட சிறப்பு விசாரணை அமர்வு அமைக்கப்பட்டு தொடர்ந்து 7 மாதங்கள் விசாரணை நடந்தது. இவ்வாண்டு சனவரியில் இறுதி தீர்ப்பு வழங்குவதற்கு வழக்கு ஒத்திவைக்கப்பட்டது.

உயர்நீதிமன்ற சிறப்பு அமர்வு நீதிபதிகள் அணில் கிலோர் & சந்தக்

கடந்த 2006ஆம் ஆண்டு கைது செய்யப்பட்டு, 2015ல் குற்றவாளிகளாக தூக்கு தண்டனையும், ஆயுள் தண்டனையும் விதிக்கப்பட்ட 13 பேரும் நிரபராதிகள் என்று விடுதலை செய்யப்பட்டுள்ளனர். மேல்முறையீட்டு வழக்கு விசாரணையின் போது ஒருவர் கோவிட் தொற்றால் 2021ஆம் ஆண்டில் மறைந்தார். மீதமுள்ள 12 பேரும் மராட்டிய மாநிலத்தில் வெவ்வேறு சிறைகளில் அடைக்கப்பட்டிருந்த நிலையில் கடந்த 22.7.2025 அன்று விடுதலை செய்யப்பட்டுள்ளனர். இந்த 19 ஆண்டுகளில் ஒரு முறைகூட இந்த 12 பேருக்கு பிணை வழங்கப்படவில்லை என்பது தான் நெஞ்சை உலுக்கும் கொடுமை.

ஒட்டுமொத்த நாட்டின் கவனத்தை ஈர்த்துள்ள இந்த தீர்ப்பு மொத்தம் 671 பக்கங்களை கொண்டுள்ளது. மிகவும் விரிவான தீர்ப்பை இரண்டு நீதிபதிகளில் ஒருவரான அணில் கிலோர் எழுதியுள்ளார்.

இந்த வழக்கில் அப்பாவி இஸ்லாமியர்களுக்காக நாட்டின் முக்கியமான சட்ட ஆளுமைகளை அணுகியது ஜாமியத் உலாமா-இ-இந்த். வழக்கில் உள்ள அனைவரும் அப்பாவிகள், நடைபெற்ற தீவிரவாத சம்பவத்துக்கு எவ்விதத்திலும் தொடர்பில்லாதவர்கள் என்பதை உறுதியாக நம்பிய வழக்கறிஞர் குழு அமைக்கப்பட்டது. இதில் சென்னை உயர்நீதிமன்றத்தின் ஓய்வு பெற்ற நீதிபதி எஸ்.நாகமுத்து, ஒடிசா உயர்நீதிமன்றத்தின் தலைமை நீதிபதியாக ஓய்வு பெற்ற எஸ்.முரளிதர், நாடறிந்த வழக்கறிஞர் நித்யா ராமகிருஷ்ணன் ஆகிய மூன்று மூத்த வழக்கறிஞர்கள் மேல்முறையீட்டு சிறப்பு விசாரணை அமர்வில் ஆஜராகி வாதாடினர்.

மூத்த வழக்கறிஞர்கள் எஸ்.நாகமுத்து, எஸ்.முரளிதர் & நித்யா ராமகிருஷ்ணன்

நீதிபதி முரளிதருக்கு உச்சநீதிமன்ற நீதிபதியாக பதவி உயர்வு அளிக்க வேண்டும் என்று கொலீஜியம் பரிந்துரைத்த பின்பும், அதனை ஏற்க மறுத்தது ஒன்றிய பாஜக அரசு. உயர்நீதிமன்ற தலைமை நீதிபதியாகவே கடந்த 2023ல் ஓய்வு பெற்றார் நீதிபதி முரளிதர். இவருக்கு பதவி உயர்வு வழங்காமல் மோடி அரசு பயந்ததற்கான காரணம் இப்போது புரிந்திருக்கும்.

முந்தைய ஒன்றிய காங்கிரஸ் ஆட்சியில், துணை ராணுவப்படையுடன் இணைந்து மாவோயிஸ்ட்கள் என்ற பெயரில் அப்பாவி பழங்குடிகளை வேட்டையாடிய ‘சல்வா ஜுடும்’ எனும் தன்னார்வ கூலிப்படைக்கு எதிராக உச்சநீதிமன்றத்தில் வழக்கை நடத்தி, அதனை சட்டவிரோதம் என்று தீர்ப்பை பெற்றவர் வழக்கறிஞர் நித்யா ராமகிருஷ்ணன். 

விடுதலைக்கு வித்திட்ட வரலாற்று தீர்ப்பு!

குண்டுவெடிப்பு வழக்கை விசாரித்து தண்டனை வழங்கிய சிறப்பு விசாரணை நீதிமன்றம் வழங்கிய தீர்ப்பில் உள்ள முரண்களையும், உரிய ஆதாரம் ஏதுமின்றி குற்றஞ்சாட்டப்பட்டவர்களுக்கு எதிரான மனநிலையில் விசாரணை அதிகாரிகள் செயல்பட்ட விதத்தையும் உயர்நீதிமன்ற தீர்ப்பு வெளிப்படுத்தி உள்ளது.

காவல்நிலைய விசாரணையில் கடும் சித்ரவதைக்கு உள்ளாக்கப்பட்டு, அழுத்தத்தின் பேரில் குற்றஞ்சாட்டப்பட்ட அப்பாவிகளிடமிருந்து பெறப்பட்ட வாக்குமூலங்கள் தான் ஒட்டுமொத்த குற்றத்தையும் அவர்கள் மீது சுமத்துவதற்கு அடிப்படை ஆதாரமாக பயன்படுத்தப்பட்டுள்ளது. குற்றஞ்சாட்டப்பட்ட நபர்களிடம் கைப்பற்றப்பட்டதாக காவல்துறை சமர்ப்பித்த RDX வெடிபொருள் தான் குண்டுவெடிப்பில் பயன்படுத்தப்பட்டது என்பது நிரூபிக்கப்படவே இல்லை. மேலும், குண்டுவெடிப்பில் என்ன வெடிபொருள் பயன்படுத்தப்பட்டது என்பது கூட காவல்துறை விசாரிக்கவில்லை. அரசு சார்பில் ஆஜர்படுத்தப்பட்ட சாட்சியங்கள் நம்பத்தகுந்ததாக இல்லை, அதிலும் சிலர் பல மாதங்கள் கழித்து சம்பவம் தொடர்பாக சாட்சி சொல்வதும், குற்றவாளிகளை அடையாளம் காண்பதும் சாத்தியமா? என்பது போன்ற அடுக்கடுக்கான சந்தேகங்களும் கேள்விகளும் தீர்ப்பில் உள்ளன.

இந்திய அரசால் பொய் குற்றச்சாட்டுகளின் பெயரில் சிறை வைக்கப்பட்டுள்ள அப்பாவி இஸ்லாமியர்களை மீட்கும் போராட்டத்தில் மேலும் ஒரு அழுத்தமான வெற்றியை பதிவு செய்துள்ளது ஜாமியத் உலாமா-இ-இந்த். 

யார் இந்த ஜாமியத் உலாமா-இ-இந்த்?

ஜாமியத் அமைப்பு இஸ்லாமிய அறிஞர்களின் அமைப்பு. இந்திய சுதந்திர போராட்டத்தில் ஆங்கிலேயர்களை எதிர்த்து எண்ணற்ற இஸ்லாமிய அறிஞர்களை உயிர்கொடையாக கொடுத்தவர்கள். ஜின்னாவின் பாகிஸ்தான் பிரிவினையை எதிர்த்து, சுதந்திர இந்தியாவின் பக்கம் உறுதியாக நின்றவர்கள்.

ஜாமியத்தின் சட்ட உதவிக் குழு

இன்று அதே இந்திய நாட்டின் அரசால் தீவிரவாதிகள் என்று பொய்யாக குற்றஞ்சாட்டப்பட்டு சிறையில் வாடும் அப்பாவி இஸ்லாமியர்களின் விடுதலைக்காக சிறப்பு சட்ட உதவி குழுவை அமைத்து நீதிமன்றங்களில் சட்டப்போராட்டம் நடத்தி வருகிறது. இஸ்லாமியர்களின் அடிப்படை கடமைகளில் ஒன்றான ‘ஜகாத்’ மூலம் நிதியுதவி பெற்று சட்ட உதவி வழங்குகிறது ஜாமியத். இதுவரை 192 அப்பாவி இஸ்லாமியர்களை குற்றமற்றவர்கள் என்று நிரூபித்து விடுவித்துள்ளது.

போராளி ஷாஹித் ஆஸ்மி!

வழக்கறிஞர் ஷாஹித் ஆஸ்மி எனும் போராளியின் உயிர் தியாகம் தான் ஜாமியத்தின் சட்ட உதவிக்குழுவுக்கு விதையாக அமைந்தது. தீவிரவாத வழக்கு ஒன்றில் 7 வருடம் டெல்லி திஹார் சிறையில் அடைக்கப்பட்டிருந்த ஷாஹித், சிறையிலிருந்தவாறே பள்ளிப் படிப்பை முடித்து இளநிலை பட்டத்தையும் பெற்றார். தாம் எதிர்கொண்ட அரச வன்முறையை ஊக்கமாக கொண்டு வழக்கறிஞரானார். தீவிரவாத வழக்குகளில் சிக்குண்ட அப்பாவி இஸ்லாமியர்களுக்கு வாதாடினார்.

போராளி வழக்கறிஞர் ஷாஹித் ஆஸ்மி

‘தீவிரவாதிகளின் வழக்கறிஞர்’ என்று அழைக்கப்பட்ட ஷாஹித் ஆஸ்மி, கடந்த 2010ஆம் ஆண்டு தனது 32ஆம் வயதில் அவரது அலுவலகத்தில் வைத்தே சனாதனக் கும்பலால் சுட்டுக் கொல்லப்பட்டார்.

சாகிற வரை  17 பேரின் விடுதலைக்கு காரணமாக அமைந்தார். தனது பெயரான ‘ஷாஹித்’ என்பதற்கேற்ப அரச வன்முறையிலிருந்து அப்பாவிகளை மீட்கும் களத்தில் தனது உயிரையே தியாகம் செய்தார் ஆஸ்மி. இவரை படுகொலை செய்த வழக்கும் ஒரு பக்கம் நடந்து கொண்டிருக்கிறது. அதனூடாக, ஆஸ்மி குறித்து திரைப்படம் கூட வந்துள்ளது. அப்படிப்பட்ட மனித உரிமை போராளியாவார்.

மாலேகான் வழக்கில் சிறை மீண்ட அப்பாவிகள்

மாலேகான் குண்டுவெடிப்பும் தொடரும் சனாதன பயங்கரவாதமும்!

கடந்த 2008ஆம் ஆண்டு 8 பேர் பலியான மாலேகான் குண்டுவெடிப்பில் முதலில் இஸ்லாமிய மாணவர் அமைப்பை (சிமி) சேர்ந்த 9 இஸ்லாமியர்கள் தான் காரணம் என்று தீவிரவாத தடுப்பு குழுவால் (ATS) கைது செய்யப்பட்டனர். சிபிஐக்கு இந்த வழக்கு மாற்றப்பட்டபோதும், ATS விசாரணை சரி தான் என்றது சிபிஐ.

ஆனால் 2011ஆம் ஆண்டு தேசிய புலனாய்வு முகமை (NIA) விசாரணையில் தான், மாலேகான் குண்டுவெடிப்பை நிகழ்த்தியது ‘அபினவ் பாரத்’ என்ற சனாதன பயங்கரவாத அமைப்பு தான் என்பதை கண்டுபிடித்தது. சம்ஜவுதா ரயிலில் குண்டு வைத்த தீவிரவாதி சாமியார் அசீமானந்தா இதனை வாக்குமூலமாக அளித்தார்.

சனாதன பயங்கரவாதிகள் சாமியார் அசீமானந்தா, சாமியார் பிரக்யா சிங் & கர்ணல் புரோஹித்

மாலேகான் வழக்கில் குற்றஞ்சாட்டப்பட்டுள்ள பாஜக முன்னாள் எம்.பி. பெண் சாமியார் பிரக்யா சிங், கர்ணல் புரோஹித், மேஜர் உபத்யாய், அஜய் ராஹிர்கர், சுதாகர் திவேதி, சுதாகர் சதுர்வேதி மற்றும் சமீர் குல்கர்ணி ஆகியோர் என்.ஐ.ஏ நீதிமன்றத்தில் தீர்ப்பை எதிர்நோக்கியுள்ளனர். சாமியார் பிரக்யா சிங்குக்கு தூக்கு தண்டனையை கோரியுள்ளது என்.ஐ.ஏ.

இந்த வழக்கில் தூக்கு கயிற்றுக்கு முதலில் பொய்யாக நிறுத்தப்பட்ட அந்த அப்பாவி 9 இஸ்லாமியர்களுக்கும் வாதாடியது வழக்கறிஞர் ஷாஹித் ஆஸ்மி தான் என்பது குறிப்பிடத்தக்கது. விசாரணை கைதிகளாக 5 ஆண்டுகள் கழித்து 2011ல் பிணை கிடைக்கப் பெற்றது. 2016ஆம் ஆண்டு வழக்கிலிருந்து முழுவதும் விடுவிக்கப்பட்டனர்.

பிரதமர் மோடி & சாமியார் அசீமானந்தா

மும்பை ரயில் குண்டு வெடிப்பு வழக்கு விசாரணை நீதிமன்றத்தில் இருந்தபோது, குற்றஞ்சாட்டப்பட்டவர்களை ‘மரண வியாபாரிகள்’ என்று வர்ணித்தார் அரசு வழக்கறிஞர் ராஜா தாக்ரே.

2006 மும்பை ரயில் தொடர் குண்டுவெடிப்பு காலத்தில் சனாதன பயங்கரவாதிகளால் நிகழ்த்தப்பட்ட சம்ஜவுதா ரயில் குண்டுவெடிப்பு, மாலேகான் குண்டுவெடிப்பு, மெக்கா மசூதி குண்டுவெடிப்பு, அஜ்மீர் தர்ஹா குண்டுவெடிப்பு வழக்குகளில் தொடர்புடைய சாமியார் அசீமானந்தா, சாமியார் பிரக்யா சிங் தாகூர், கர்ணல் புரோஹித் உள்ளிட்ட காவி தீவிரவாதிகளை மீண்டும் விசாரணைக்கு உட்படுத்த வேண்டும். மும்பை ரயில் குண்டுவெடிப்பில் இந்த மரண வியாபாரிகளுக்கு உள்ள தொடர்பை வெளிக்கொணர வேண்டும்.  

உச்சநீதிமன்றத்தின் முதுகெலும்பு!

கடந்த  ஜூலை 21ஆம் தேதி வெளியான தீர்ப்பை எதிர்த்து மராட்டிய அரசு உச்சநீதிமன்றத்தை அணுகியுள்ளது. ஜூலை 25 அன்று வழக்கை விசாரணைக்கு எடுத்துக்கொள்வதாக தலைமை நீதிபதி கவாய் அமர்வு தெரிவித்துள்ளது. ஒன்றிய அரசின் அழுத்தத்துக்கு ஆட்படாமல், அப்பாவிகளை விடுதலை செய்த உயர்நீதிமன்ற தீர்ப்பை உச்சநீதிமன்றம் உறுதிப்படுத்த வேண்டும்.

தலைமை நீதிபதி சந்திரசூட் வீட்டில் மோடி பஜனை

பீமா கொரேகான் தொடர்பான அப்பட்டமான பொய் வழக்கில் சிறை வைக்கப்பட்டுள்ள அறிஞர்கள், எழுத்தாளர்கள், பேராசிரியர்கள், செயற்பாட்டாளர்கள் மற்றும் கலைஞர்கள் உள்ளிட்டோரின் பிணையை கூட உறுதி செய்யாமல் தவிர்த்த வரலாறு கொண்டது தான் உச்சநீதிமன்றம். ஒன்றிய அரசுடன் இணக்கமாக சென்ற தலைமை நீதிபதி சந்திரசூட்டை விட, துணிந்து நின்ற நீதிபதி சஞ்சீவ் கண்ணாவை தான் மக்கள் கொண்டாடுகின்றனர் என்பதை தலைமை நீதிபதி கவாய் நினைவில் கொள்ள வேண்டும். ஏற்கனவெ ஒன்றிய அரசின் கூலிப்படையாக செயல்படும் அமலாக்கத்துறையையும் தேர்தல் ஆணையத்தையும் சட்டத்தின் துணை கொண்டு வறுத்தெடுத்து வருகிறார் என்பது ஆறுதல்.

உச்சநீதிமன்ற தலைமை நீதிபதி பி.ஆர்.கவாய்

புரட்சியாளர் அம்பேத்கரின் அரசமைப்பு சட்டம் தந்த முதுகெலும்புடன் உச்சநீதிமன்றம் நிமிர்ந்து நிற்கட்டும்.

அப்பாவி முஸ்லீம்களை படுகொலை செய்வதும் அவர்களை பொய் வழக்குகளில் சிறைப்படுத்துவதும் மோடி தலைமையிலான சனாதனக்கும்பலின் சதி வேலையாகவே தொடர்கிறது. இந்த பயங்கரவாதத்திற்கு  தலைமை நீதிபதி முற்றுப்புள்ளி வைக்கட்டும்.

- வன்னி அரசு
  23.07.2025

தலித் வாக்குகள்: மோடியின் வீழ்ச்சியும் காங்கிரஸ் எழுச்சியும்

ஜனநாயகம் என்பது வெறும் அரசாங்க வடிவம் மட்டுமல்ல. இது முதன்மையாக தொடர்புடைய வாழ்க்கை முறை, இணைந்த தொடர்பு அனுபவம். இது அடிப்படையில் சக மனிதர்களுக்கு மரியாதை மற்றும் மரியாதைக்குரிய அணுகுமுறையாகும் - புரட்சியாளர் அம்பேத்கர்

தலித் எழுச்சி - மோடியின் வீழ்ச்சி:

இந்திய ஜனநாயகத்தின் மாண்பு சிதைக்கப்படும் போதெல்லாம் தலித் மக்கள் நாட்டின் இறையாண்மையைக் காத்துள்ளனர். சனாதனம் உயர்த்திப்பிடிக்கப்பட்ட போதும், சாதி ரீதியான கட்டமைப்புக்கு எதிராகவும், பொது சமூகத்தின் உரிமைக்கும் சேர்த்தே தலித் மக்கள் குரல் கொடுத்திருக்கின்றனர். உண்மையில், இந்தியாவின் வரலாறு என்பது ஒடுக்குவோருக்கும் ஒடுக்கப்படுவோருக்கும் இடையில் நடந்த போராட்டத்தின் வரலாறு தான். பார்ப்பனீயம் - சனாதனம் - மனு உள்ளிட்டவை இந்திய மக்களை பிரித்து சாதிய சமூகமாக பாகுபடுத்தி அரசியல் செய்த போது இதனை துணிச்சலோடு எதிர்த்தவர்கள் தலித் மக்கள் தான்.

கீழ் வெண்மணி மற்றும் பீமா கொரேகான் என இந்திய சரித்திரத்தில் ஒரு எழுச்சியையே தலித்துகள் தங்களின் உரிமை முழக்கத்தின் மூலமாக நிலைநாட்டி காட்டியிருக்கிறார்கள். 2024 ஆம் ஆண்டு மோடிக்கு எதிராக ஜனநாயக முறைப்படி வாக்கு அரசியலில் தலித் மக்கள் மிகவும் நுட்பமான ஒரு அரசியல் போராட்டத்தை நடத்தி மோடிக்கு கடிவாளம் போட்டுள்ளனர்.

பாஜக தனது பெரும்பான்மை பலத்தை நிரூபிக்க முடியாமல் போனதற்கும், கூட்டணியை நம்பியே ஆட்சியை தொடர வேண்டும் என்ற நிர்பந்தத்தை உருவாக்கியதே தலித் மக்களின் எழுச்சி தான். அதாவது, பட்டியலின மக்களுக்காக ஒதுக்கப்பட்ட தொகுதிகளில் 2019 நாடாளுமன்ற தேர்தலில் பாஜக 77 தொகுதிகளில் வெற்றி பெற்றது. 2019 தேர்தலுடன் ஒப்பிடும் போது 2024 நாடாளுமன்ற தேர்தலில் வெற்றி பெற்ற 77 தொகுதிகளில் 22 இடங்களில் பாஜக தோற்று தற்போது 55 தொகுதிகளை மட்டுமே பாஜக தக்கவைத்துள்ளது. நாடாளுமன்றத்தில் பெரும்பான்மையை நிரூபிக்க மொத்தம் 272 இடங்கள் தேவை. இதில், பாஜக வெறும் 240 தொகுதிகளை தான் கைவசம் வைத்துள்ளது. பெரும்பான்மையை நிரூபிக்க பாஜகவுக்கு 32 இடங்கள் கூடுதலாக தேவைப்பட்டன. பாஜக செல்வாக்கு உள்ளதாக மோடி கும்பலால் திரும்பத் திரும்ப செல்லப்படும் உத்தரப்பிரதேசம், மகாராஷ்டிரா, ராஜஸ்தான், சத்தீஸ்கர், மேற்கு வங்கம், ஒடிசா உள்ளிட்ட இடங்களில் பாஜகவை தலித் மக்கள் ஜனநாயகத்திற்கு எதிரி என இனம் காட்டி வெளியே தள்ளியுள்ளனர். 

மோடியை பணியச் செய்த இந்திய அரசியலமைப்பு சட்டம்

தலித் மக்களின் இந்த எழுச்சி தான் மோடியின் ஆட்சி கட்டிலை அசைத்துப் பார்த்துள்ளது. ஒவ்வொரு நாளும் பிரதமர் நாற்காலியில் மோடி நடுக்கத்துடன் அமர்ந்திருக்கும் சூழலை உருவாக்கியுள்ளது. எப்படி நடந்தது இது என்பதை விரிவாக ஆராய்ந்தால் பல நுட்பமான விஷயங்கள் வெளிச்சப்படுகின்றன. 

வட இந்தியாவில் கோலோச்சிய தலித் மக்கள்:

இந்தியா முழுமைக்கும் மொத்தம் 131 தொகுதிகள் பட்டியல் இன மற்றும் பழங்குடியினருக்காக ஒதுக்கப்பட்டுள்ளது. உத்தரப்பிரதேசம், ராஜஸ்தான், மகாராஷ்டிரா, ஹரியானா, கர்நாடகா, பீகார், பஞ்சாப் மற்றும் மேற்கு வங்கம் ஆகிய மாநிலங்களில் 19 இடங்களில் பாஜகவுக்கு எதிராக பட்டியலின மக்கள் இந்தியா கூட்டணியை ஆதரித்து வாக்களித்துள்ளனர். மகாராஷ்டிரா, ஜார்கண்ட், கர்நாடகா, ராஜஸ்தான் மற்றும் மேற்கு வங்கம் முழுவதிலும் 10 பழங்குடியின தொகுதிகளை பாஜக இழந்துள்ளது.

இதில், நுட்பமாக கவனிக்க வேண்டியது என்னவென்றால், பட்டியலின மக்களுக்கான தொகுதிகளில் 12 தொகுதிகளையும் பழங்குடியின மக்களுக்கான தொகுதிகளில் 7 இடங்களையும் பாஜகவிடம் இருந்து காங்கிரஸ் கைப்பற்றியுள்ளது. 2014ல் பட்டியலின பழங்குடியின மக்களின் தொகுதிகளில் 71 இடங்களையும், 2019ல் 77 இடங்களையும் பாஜக கைப்பற்றியது. மறுபக்கத்தில், 2019ல் 7 இடங்களை மட்டுமே தக்கவைத்திருந்த காங்கிரஸ் தற்போது பழங்குடியின மற்றும் பட்டியலின தொகுதிகளில் 32 தொகுதிகளை மீட்டுள்ளது. அதில் 19 தொகுதிகளை நேரடியாக பாஜகவை வீழ்த்தியுள்ளது ஒருவகையில், பாஜகவின் சனாதனத்துக்கு எதிராக காங்கிரஸ் கட்சியோடு தலித் மக்கள் கைகோர்த்து நின்றுள்ளனர் என்பதை இதன் மூலம் அறிந்துகொள்ளலாம்.

சமாஜ்வாதி கட்சி (SP) உத்தரபிரதேசத்தில் பட்டியலின மக்களுக்கான ஐந்து தொகுதிகளைக் கைப்பற்றியது; திரிணாமுல் காங்கிரஸ் (டிஎம்சி) கூச்பெஹாரில் வெற்றி பெற்றது. தும்காவில் ஜார்க்கண்ட் முக்தி மோர்ச்சா (ஜேஎம்எம்) வெற்றி பெற்றது; சரத்பவாரின் தேசியவாத காங்கிரஸ் கட்சி (NCP-SP)பாஜகவுக்கு எதிராக நின்ற திண்டோரியை கைப்பற்றியது.

பழங்குடிகள் இந்துக்கள் அல்ல, தனித்த சமய நம்பிக்கை கொண்டவர்கள் என்ற கருத்தை முன்வைக்கும் பாரதிய ஆதிவாசி கட்சியின் (BAP) ராஜ்குமார் ரோஹத் காங்கிரஸ் ஆதரவுடன் ராஜஸ்தானின் பன்ஸ்வாரா தொதிகுதியில் பாஜக வேட்பாளரைவிட 2 லட்சத்துக்கும் அதிகமான வாக்கு வித்தியாசத்தில் வெற்றி பெற்றுள்ளார். பழங்குடிகளுக்கு ’பில் (Bhil) மாநிலம்’ கோரிக்கையை இன்னும் தீவிரப்படுத்துவோம் என்று அறிவித்துள்ளார் ராஜ்குமார்.

பீர்சா முண்டா படத்துடன் ஒட்டகத்தில்மக்களவைக்கு வந்த ராஜ்குமார் ரோஹத்

ஜார்க்கண்ட் மாநில முன்னாள் முதலமைச்சரும் ஒன்றிய அமைச்சரவையில் பழங்குடியினர் விவகார அமைச்சராக பொறுப்பு வகித்த அர்ஜூன் முண்டாவை குந்தி தொகுதியில் காங்கிரஸ் வேட்பாளர் காளி சரண் முண்டா கிட்டத்தட்ட ஒரு லட்சத்து 5 ஆயிரம் வாக்குகள் வித்தியாசத்தில் வீழ்த்தியுள்ளார். ஜார்கண்ட் மாநிலத்தில் அமைந்துள்ள பழங்குடிகளுக்கான 5 தனி தொகுதிகளிலும் பாஜக படுதோல்வி அடைந்துள்ளது.

சிதம்பரம் தொகுதியில் விடுதலை சிறுத்தைகள் கட்சி தலைவர் தொல். திருமாவளவனை எதிர்த்து போட்டியிட்ட பாஜக வேட்பாளரும் வேலூர் முன்னாள் மேயருமான கார்த்தியாயினி (3,36,591) 3 லட்சம் வாக்குகள் வித்தியாசத்தில் படுதோல்வி அடைந்துள்ளார். விழுப்புரம் தொகுதியில் விடுதலை சிறுத்தைகள் கட்சியின் பொதுச்செயலாளர் அறிஞர் ரவிக்குமாரை எதிர்த்து போட்டியிட்ட பாஜக கூட்டணியில் இடம்பெற்ற பா.ம.க வேட்பாளர் முரளி சங்கர் 2 லட்சம் வாக்குகள் வித்தியாசத்தில் தோல்வியைத் தழுவினார். (தமிழ்நாட்டின் நிலவரத்தை இன்னொரு பத்தியில் விரிவாக பேசலாம்.)

தலித் மக்களின் எழுச்சி எப்படி?

புரட்சியாளர் அம்பேத்கர் தொடங்கி வைத்த கருத்தியல் நெருப்பு 2024 நாடாளுமன்ற தேர்தலிலும் பரவியது. இந்த தேர்தலில் யார் ஆட்சிக்கு வரக் கூடாது என்பதில் தலித் மக்கள் மிகவும் உறுதியாக இருந்துள்ளனர். அதாவது, பாஜக மீண்டும் ஆட்சிக்கு வந்தால் இந்திய அரசியல் சாசனத்தையே மாற்றிவிடுவார்கள் என்று இந்தியா கூட்டணி தலைவர்கள் மக்களிடம் உண்மையை விளக்கினர். விடுதலை சிறுத்தைகள் கட்சியின் தலைவர் திருமாவளவன் 2019 நாடாளுமன்ற தேர்தலுக்கு முன்பாகவே மோடியை காத்திரமாக எதிர்த்தவர். தமிழ்நாட்டில், 2014ல் இருந்து உண்மையிலேயே மோடியை, ஆர்.எஸ்.எஸ். சங்பரிவார் கும்பலை கொள்கைரீதியாக திருமாவளவன் வலுவாக தொடர்ந்து எதிர்த்து வந்தார். பாஜக - மோடி மீண்டும் ஆட்சிக்கு வந்தால் இந்திய அரசியலமைப்பை மாற்றிவிடுவார்கள். புரட்சியாளர் அம்பேத்கர் தலித் மக்களுக்கு போராடி பெற்றுக்கொடுத்த உரிமைகளைக் கூட மோடி கும்பல் பறித்து சனாதனவாதிகளின் கையில் கொடுத்துவிடுவார்கள் என்று முழங்கினார். திருமாவளவனின் சனாதன எதிர்ப்பு முழக்கத்தை பொறுத்துக்கொள்ள முடியாத ஆர்.எஸ்.எஸ். - பாஜக கும்பல் தலைவர் திருமாவளவனுக்கு எதிராக போராட்டம் நடத்தியும் உருவ பொம்மையை எரித்தும் அமைதிக்கு குந்தகம் விளைவித்தனர். ஆனால், 2014லிருந்து தலைவர் திருமாவளவன் எதை முழங்கினாரோ அந்த கருத்து தான் இன்றைக்கு தேசிய முக்கியத்துவம் வாய்ந்ததாக பார்க்கப்பட்டுள்ளது.

வட இந்தியாவின் தலைவர்கள் தங்கள் பிரச்சாரத்தினூடாக இந்த கருத்தையும் தலித் மக்களிடம் கொண்டு சேர்த்தனர். இதன் குறியீடுதான், பாஜக பெரும்பான்மையை நிரூபிக்கவில்லை என்பது உறுதியான உடனேயே, காங்கிரஸ் முன்னணி தலைவர் ராகுல்காந்தி செய்தியாளர்களை சந்தித்த போது அம்பேத்கர் வகுத்துக்கொடுத்த அரசியல் சாசனத்துடன் செய்தியாளர்களை சந்தித்தார். மோடி மீண்டும் ஆட்சிக்கு வந்தால் அம்பேத்கர் வகுத்தளித்த அரசியல்சாசனத்தின் மீது பேரிடி விழும் என்ற எச்சரிக்கை மணியை தலித் மக்கள் மிகத்தெளிவாக புரிந்துகொண்டனர். இந்த அரசியல் புரிதல் தான் சர்வாதிகாரி மோடிக்கு தற்போது கடிவாளம் போட்டுள்ளது.

யாரைத் தேர்ந்தெடுக்க கூடாது என்பதில் தெளிவு:

தலித் வேட்பாளர்கள் என்ற அளவில் பாஜகவும் அதன் கூட்டணி கட்சிகளும் கூட தனித்தொகுதிகளில் வேட்பாளர்களைக் களமிறக்கின. ஆனால், தனித்தொகுதியில் இருந்த வாக்காளர்கள் சர்வாதிகாரி மோடியும் அவரது வகையராக்களும் ஆட்சி அதிகாரத்தை அடைந்துவிடக்கூடாது என்பதில் தெளிவாக இருந்தனர். இந்தியாவின் ராஜஸ்தான் மற்றும் குஜராத்தில் ஜைனர்கள், தமிழ்நாட்டில் கவுண்டர்கள், கர்நாடகாவில் லிங்காயத்துகள், மகாராஷ்டிராவில் மராட்டியர்கள், ஆந்திரா மற்றும் தெலுங்கானாவில் ரெட்டிகள் சிறிய எண்ணிக்கையில் உள்ளனர். இந்த இடங்களில் தலித்துகளின் வாக்குகளை மிஞ்சி சில வாக்குகள் பாஜக வசம் சென்றன. இருப்பினும் கூட பாஜகவால் வெற்றிப்பெறமுடியவில்லை.

விழுப்புரம், சிதம்பரம் தொகுதிகளை எடுத்துக்கொண்டால், தலைவர் திருமாவளவனையும் அறிஞர் ரவிக்குமாரையும் வீழ்த்தும் முழு வீச்சில் ஆர்.எஸ்.எஸ். - சங்பரிவார் கும்பல் தீவிரமாக களமாடியது. சிதம்பரம் நாடாளுமன்ற தொகுதியில் ஆர்.எஸ்.எஸ் - சங்பரிவார் நேரடியாகவே தேர்தல் பணி செய்வதை ஊடகங்கள் செய்தியாக வெளியிட்டன. இவர்களோடு, பாஜக கூட்டணியில் இருக்கும் பாமகவும் தலைவர் திருமாவளவனுக்கு எதிராக தேர்தல் பரப்புரையில் இறங்கியது. சிதம்பரத்தில் நடந்த தேர்தல் பொதுக்கூட்டத்தில் பாஜக வேட்பாளர் கார்த்தியாயினியை ஆதரித்து பேசிய பாமக தலைவர் அன்புமணி ராமதாஸ், சிதம்பரத்தில் பானையை உடைத்தே ஆகவேண்டும் என்றார். ஆனால், நடந்தது என்ன? மிகவும் பிற்படுத்தப்பட்ட வன்னிய சொந்தங்களும் கூட தலைவர் திருமாவளவனுக்கு ஆதரவாக நின்றனர். ஜெயங்கொண்டம், ஆண்டிமடம் உள்ளிட்ட இடங்களில் தான் அதிமுக இரண்டாம் இடம்பிடித்தது. ஆனால், பாமகவின் நிலை என்ன ஆனது? சர்வாதிகாரத்தையும் சாதிய கொடுங்கோன்மையையும் சிதம்பரம் தொகுதி மக்கள் மிக உறுதியாக எதிர்த்தனர்.

தலைவர் எழுச்சித்தமிழர் - அறிஞர் ரவிக்குமார்

பாஜக செல்வாக்கு செலுத்தும் மாநிலமாக பார்க்கப்படும் உத்தரப்பிரதேச அரசியல் களத்திலும் தலித் மக்கள் பாஜகவை விரட்டி அடித்துள்ளனர். இதில், இன்னொரு விஷயத்தையும் தெளிவாக புரிந்துகொள்ளலாம். உத்தரப்பிரதேசத்தில் பாஜக - சமாஜ்வாதி - பகுஜன் சமாஜ் கட்சி அதிகாரம் கொண்ட கட்சிகளாக இருக்கின்றன. மறைமுகமாக பாஜக உடன் பகுஜன் சமாஜ் கட்சி கூட்டணியில் இருப்பதை உத்தரப்பிரதேச மக்கள் தெளிவாகவே புரிந்துகொண்டனர். ராம்தாஸ் அத்வாலே, மாயாவதி இருவரும் அம்பேத்கரின் கொள்கையில் இருந்து பிறழ்ந்து செல்வதை உத்தரப்பிரதேச மக்கள் தெளிவாகவே இனங்கண்டு கொண்டுள்ளனர். இந்த இடத்தில் ஒரு ஒப்புமையை பார்க்க வேண்டி இருக்கிறது. அம்பேத்கரிய சிந்தனையை சர்வாதிகாரத்தையும் ஆர்.எஸ்.எஸ். சித்தாந்தத்தை எதிர்க்கும் தலைவர் திருமாவளவனை மக்கள் தமிழ்நாட்டில் ஆதரித்ததையும், அம்பேத்கரியத்திலிர்ந்து விலகிச் சென்ற மாயாவதியை உத்தரப்பிரதேசத்தில் மக்கள் எதிர்த்ததையும் ஒப்பிட்டுபார்க்கலாம். அதாவது, பகுத்தறிவு மாநிலம் சாதி, மத அடையாளங்களுக்கு அப்பால் சென்று பகுத்தறிவுடன் தலைவர் திருமாவளவனை அங்கீகரித்துள்ளனர். பக்தி உச்சமாக இருக்கும் உத்தரப்பிரதேசத்தில் மோடியை எதிர்க்காததால் மாயாவதியையும் மக்கள் நிராகரித்துள்ளனர்.

பகுஜன் சமாஜ் தலைவர் மாயாவதி

மாயாவதியின் இந்த வீழ்ச்சி ஒருபக்கம் அம்பேத்கரிய சித்தாந்தத்தில் இருந்து விலகிச் செல்வதாலும் மற்றொருபுறம், மக்களை நேரடியாக பாதிக்கக் கூடிய விஷயங்களில் மௌனமாக இருந்ததன் விளைவால் ஏற்பட்டது. சர்ச்சைக்குரிய CAA க்கு எதிரான போராட்டங்களின் போது மாயாவதி மற்றும் பகுஜன் சமாஜ் கட்சி தலைவர்களும், உத்தரப்பிரதேச முதலமைச்சர் யோகி ஆதித்யநாத்தை தூண்டிவிட்டு NRC ஐ முன்மொழிந்தனர். ஆனால் யார் பாதிப்பை ஏற்படுத்தினார்கள்? மிருகத்தனமான காவல் சித்ரவதை அடக்குமுறைகளையும் தோட்டாக்களையும் எதிர்கொண்டவர்கள் முஸ்லிம்களும் தலித் மக்களுமாக இருந்தார்கள். பாதிக்கப்படும் தலித், இஸ்லாமியர்களுக்காக மாயாவதி குரல் கொடுக்காததன் பலனை தேர்தல் தோல்வி மூலமாக அடைந்துவிட்டார்.

பாஜகவின் மிருகத்தனமான போக்கு:

பாஜக 400 தொகுதிகளிலும் வெற்றி பெறும் என்ற முழக்கத்தை தலித் மக்கள் முற்று முழுதாக நிராகரித்துவிட்டனர். அப்கி பார் 400 என்ற பாஜகவின் முழக்கமும் ”சம்விதன் காத்ரே மெய்ன் ஹை” (அரசியலமைப்புக்கு ஆபத்து வந்துவிட்டது) என்ற இரண்டையும் இந்தியாவில் உள்ள தலித் மக்கள் பொறுத்தி பார்த்து பாஜகவுக்கு வாக்களித்துள்ளனர். ”ஹிந்து காத்ரே மெய்ன் ஹை” அதாவது ”இந்துக்களுக்கு ஆபத்து” என்ற பாஜகவின் 10 ஆண்டுகால பரப்புரையை மக்கள் புறக்கணித்துள்ளனர். இங்கு தான் நுட்பமான ஒருவிடயத்தைக் கருத்தில் கொள்ள வேண்டும். இந்துத்துவ பெரும்பான்மை வாதத்திற்கு எதிராக அண்ணல் அம்பேத்கர் பற்றவைத்த தீயானது இன்றைக்கும் அணைந்துவிடவில்லை என்பது தான் அந்த செய்து. ஒருபக்கம், அந்த சுடரை தலைவர் திருமாவளவன் ஏந்தி நிற்பதும் மற்றொரு பக்கம் கன்ஷிராமால் வளர்த்தெடுக்கப்பட்ட மாயாவதி ஏந்த தவிர்த்ததன் விளைவுகளை மக்கள் பாடமாக கொடுத்துள்ளனர். அம்பேத்கர் தன் வாழ்நாள் இறுதி வரைக்கும் ஆர்.எஸ்.எஸ். - சனாதன - இந்துத்துவ கருத்திற்கு எதிராக இருந்தார். அகண்ட பாரதம், இந்தியா இந்துக்களுக்கான நாடு என்ற சனாதனவாதிகளுக்கு ஒவ்வொரு சந்தர்ப்பத்திலும் தக்க பதிலடியைக் கொடுத்துக்கொண்டு தான் இருந்தார்.

மக்களவையில் தலைவர் - பொதுச்செயலாளர்

மோடியின் இரண்டாவது ஆட்சி காலம் முழுக்க முழுக்க சனாதன கருத்துக்களை உச்சம் அடைய செய்த காலமாக மாறியது. இஸ்லாமியர்கள், தலித்துகள் மீதான தாக்குதல்கள் தலைவிரித்தாடின. இதனை தலித், இஸ்லாமிய மக்கள் உன்னிப்பாக கவனித்துக்கொண்டிருந்தனர். இந்த சூழலில் தான், 400 இடங்களை பாஜக கைப்பற்றும் என்ற முழக்கத்தை இந்திய ஜனநாயகத்திற்கான பெரிய ஆபத்தாக இந்தியாவில் உள்ள தலித் மக்கள் பார்த்து பதிலடி கொடுத்துள்ளனர். இந்த தீவிர இந்துத்துவ மனநிலையை மாயாவதி எதிர்க்காததால் தான் 488 இடங்களில் போட்டியிட்டும் ஒன்றில் கூட பகுஜன் சமாஜ் கட்சி வெற்றி பெறவில்லை. உத்தரப்பிரதேசத்தில் அதன் வாக்கு வங்கி 2019ல் 19.42 சதவிகிதமாக இருந்து 2024ல் அதன் வாக்கு வங்கி 9.39 சதவிகிதமாக குறைந்துள்ளது. அம்பேத்கரிய சித்தாந்தத்தால் ஈர்க்கப்பட்டு சமூக விடுதலையைக் கோரக்கூடிய சாதாரண வாக்காளர்களைக் கூட மாயாவதியால் தக்கவைக்க முடியவில்லை என்றால் அதற்கு காரணம் ஆர்.எஸ்.எஸ். - மோடியின் சர்வாதிகாரத்தை மாயாவதி தக்க நேரத்தில் கண்டிக்கத் தவறியது தான். அதே நேரத்தில் பாஜக - சங்க பரிவார் கூட்டத்தை எதிர்க்கும் தீவிர அம்பேத்கரிய அரசியலை முன்வைத்த ஆசாத் சமாஜ் கட்சியின் இளம் தலைவர் சந்திரசேகர் ஆசாத், தான் போட்டியிட்ட நாகினா தனி தொகுதியில் 1,51,000 வாக்குகள் வித்தியாசத்தில் பாஜக வேட்பாளரை வீழ்த்தினார். 2019ல் பகுஜன் சமாஜ் வென்ற தொகுதியை இம்முறை சுயேச்சையாக போட்டியிட்டு வென்றுள்ளார். பகுஜன் சமாஜின் சரியும் செல்வாக்குக்கு இது முக்கிய எடுத்துக்காட்டாக சொல்லப்படுகிறது.

அரசியல் சாசனத்தை ஏந்தி நிற்கும் சந்திரசேகர் ஆசாத்

2024 நாடாளுமன்ற தேர்தல் முடிவை தலித் மக்கள் அம்பேத்கர் வழியில் தான் பார்த்துள்ளார்கள். ஜனநாயகம் என்பது வெறும் அரசாங்க வடிவம் மட்டும் அல்ல. இது வாழ்க்கை முறை, இணைந்த தொடர் அனுபவம். சக மனிதர்களுக்கு மரியாதை மற்றும் மரியாதைக்குரிய அணுகுமுறையாக இருக்கிறது. இஸ்லாமியர்கள், தலித்துகள், குழந்தைகள் மீதான தாக்குதல் அதிகரிக்கும் போது அதனை அமைதியாக இருந்து கேள்வி கேட்ட மக்கள் தேர்தல் முடிவுகள் மூலம் பாஜக நிர்மூலமாக்கிவிட்டனர்.

நிதீஷ் – சந்திரபாபுவுக்கு ஒரு பாடம்:

மாயாவதி, ராமதாஸ் உள்ளிட்டவர்களும் கூட பாஜக ஆதரவு நிலைப்பாட்டின் மூலமாக தக்க பாடத்தைக் கற்றுக்கொண்டுள்ளனர். இவர்களுக்கு ஏற்பட்ட நிலை நாளை நிதீஷ் குமாருக்கும் சந்திரபாபுவுக்கும் ஏற்படும். சாதிவாரி கணக்கெடுப்பு நடத்தியதன் மூலமாக நிதீஷ் குமாருக்கு ஆதரவான ஒரு முடிவை பீகார் மாநிலம் கொடுத்துள்ளது. சாதிவாரி கணக்கெடுப்புக்கு எதிராகவும், மண்டல் கமிஷனுக்கு எதிராக கமண்டல் கமிஷனையும் முன்னிறுத்தும் பாஜகவின் ஊதுகுழலாக நிதீஷ் மாறினால் அவரின் அரசியல் எதிர்காலமும் கேள்விக்குறியாகிவிடும்.

தெலுங்கானாவில் ஆளும் காங்கிரஸ் கட்சியானது போட்டியிட்ட நான்கு தனித் தொகுதிகளிலும் வெற்றிபெற்றுள்ளது. குல்பர்கா தனி தொகுதியை பாஜக இழந்துள்ளது. கர்நாடகா மாநிலத்தில் ஐந்து தனித்தொகுதிகளில் பாஜக படுதோல்வியை சந்தித்துள்ளது. மகாராஷ்டிராவிலும் கூட தனித்தொகுதியாக உள்ள ஒன்பது தொகுதிகளில் ஆறு தொகுதிகளில் பாஜக வேட்பாளர்களை காங்கிரஸ் வேட்பாளர்கள் படுதோல்வி அடையச் செய்துள்ளனர். ராஜஸ்தானில் பாஜகவின் கட்டுப்பாட்டில் இருந்த பல தலித் மக்களுக்காக ஒதுக்கப்பட்ட தனித்தொகுதிகளில் பாஜக படுதோல்வியை சந்தித்துள்ளது.

ஒரு ஆணவ போக்கு அரசியல் வரலாற்றில் எதையெல்லாம் செய்யும் என்பதை மோடியின் இந்த சறுக்கல் மூலமாகவும் ஒரு சிறிய அமைப்பு கூட ஜனநாயகத்தின் மாண்பை காக்க தனது அரசியல் ஆயுதம் மூலமாக பதிலடி கொடுக்க முடியும் என்பதை தலித் மக்களின் வாக்கு அரசியல் மூலமும் புரியவைத்துள்ளது. வரலாற்று ரீதியாக மோடிக்கு எதிராக தலித் மக்கள் கொடுத்துள்ள இந்த பதிலடியை மோடியின் அரசியல் வரலாற்றில் மறக்கவே முடியாத பதிவு செய்யப்பட வேண்டிய ஒரு வரலாற்று நிகழ்வு. குஜராத்தின் முதல்வராக மோடி இருந்த காலம் தொடங்கி 2024 தேர்தல் முடிவுகள் அறிவிக்கப்படும் வரை கூட மோடி தன்னை ஒரு அசைக்கவே முடியாத சக்தியாக நிறுவிக்கொண்டே இருந்தார். ஆனால், தேர்தல் முடிவுகள் வெளியான பிறகு பாஜகவும் மோடியும் வெறும் மைனாரிட்டிகள் தான் என்பதை தலித் மக்கள் மோடிக்கு கற்றுக்கொடுத்துவிட்டனர். இடஒதுக்கீட்டிற்கு எதிராகவும், இஸ்லாமியர்களை வஞ்சித்ததற்கு கைமாறாகவும் உனாவில் தலித் மக்கள் கொடுமைப்படுத்தப்பட்டதற்கான நீதி போராட்டத்திற்கு கிடைத்த அறத்தின் வெற்றியாகவும் தலித் மக்கள் ஜனநாயகத்திற்கு கொடுத்துள்ள செய்தியாக இந்த தனித்தொகுதிகளில் தலித்துகளின் வெற்றியைப் பார்க்கிறேன்.

இந்தியா அரசியலில் தவிர்க்க முடியாதவர்கள் தலித்துகள் என்பதையும் தலித்துகளின் எழுச்சி ஒரு புரட்சி பாதையின் நெருக்கத்தை அடைந்துவிட்டது என்பதை மோடி கும்பல் உள்வாங்கிக்கொண்டுவிட்டது.

- வன்னி அரசு

(நக்கீரன் இதழில் ஜூன் 22 வெளியான கட்டுரை)

மோடியின் வீழ்ச்சி தொடங்கியது!

சிலப்பதிகாரத்திலே ஒரு காட்சி.

பாண்டியனின் அரண்மனைக்குள் நுழைந்த கண்ணகி, செங்கோலும் வெண்குடையும் / செறிநிலத்து மறிந்துவீழ்தரும்/நங்கோன்றன் கொற்றவாயில் / மணிநடுங்க நடுங்குமுள்ளம்/ இரவுவில்லிடும் பகல்மீன்விழும் / இருநான்கு திசையும் அதிர்ந்திடும்/வருவதோர் துன்பமுண்டு/ மன்னவற் கியாம் உரைத்துமென

(பொருள்) அரசனுடைய செங்கோலும் வெண்கொற்றக் குடையும் நிலத்தில் மடங்கி வீழும். நம் மன்னனது வெற்றி தரும் வாயிலின்கண் கட்டிய மணி என்னுள்ளம் நடுங்கும் வண்ணம் அசையும்.  இரவு நேரம் வான வில்லைத் தோற்றுவிக்கும். பகற் காலத்து விண்மீன்கள் எரிந்து கீழே விழும், எட்டுத் திசையும் அதிரும், ஓரு துன்பம் மன்னனுக்கு வர இருக்கிறது. நான் அரசனுக்கு இச் செய்தியைக் கூறுகிறேன் என்று கண்ணகி கூறுவார். இதே செய்தியைத் தான் 18-வது மக்களவைத் தேர்தல் முடிவுகள் மோடி என்கிற மன்னனுக்கு கூறியுள்ளது.

 

மோடியின் 400 தொகுதி வெற்றி முழக்கம் வெற்று முழக்கமாகிவிட்டது. ராமர் கோயில் அரசியலுக்கு சம்மட்டி அடி விழுந்துள்ளது. ராமர் கோயில் இருக்கும் ஃபைசாபாத் தொகுதியிலேயே பாஜக மண்ணைக் கவ்வியுள்ளது. பாஜக வேட்பாளர் லல்லு சிங்கை விட, அவரை எதிர்த்து போட்டியிட்ட சமாஜ்வாடி வேட்பாளர் அவ்தேஷ் பிரசாத் 55 ஆயிரம் வாக்குகள் வித்தியாசத்தில் வெற்றிபெற்றார். கூடுதல் மகிழ்ச்சி என்னவென்றால், ராமர், இந்துத்துவா என தலித்துகளுக்கு எதிராக செயல்பட்ட லல்லு சிங் தோற்றது தலித் வேட்பாளரான அவ்தேஷ் பிரசாத்திடம் தான்.

அகிலேஷ் யாதவ் உடன் அவ்தேஷ் பிரசாத்

                                             

நாட்டின் ஒரே பழங்குடியின முதலமைச்சராக  இருந்த ஹேமந்த் சோரன் அமலாக்கத்துறையால் சிறை வைக்கப்பட்ட நிலையில், ஒன்றிய பழங்குடியினர் நலத்துறை அமைச்சராக இருந்த அர்ஜூன் முண்டா, சோரனின் வேட்பாளரிடம் தோல்வியடைந்தார். ஜார்கண்ட்டின் பழங்குடியினருக்கான ஐந்து தொகுதிகளிலும் பாஜக படுதோல்வி அடைந்துள்ளது.

 

பாஜக ஆளும் ஹரியானா, ராஜஸ்தான் மாநிலங்களில் பாஜகவின் அரசியல் சரிவு பட்டவர்த்தனமாகிவிட்டது. மோடி தனது தொகுதியான வாரணாசியில் பெற்ற வெற்றியை விட இரண்டு மடங்கு கூடுதல் வாக்குகளுடன் ரேபரேலி தொகுதியில் ராகுல் காந்தி வெற்றி பெற்றுள்ளார். வாரணாசி தொகுதியில் மோடியை எதிர்த்து மீண்டும் களமிறங்கிய மாநில காங்கிரஸ் தலைவர் அஜய் ராயுடன் கடும் போட்டிக்கிடையே தான் வெற்றி பெற முடிந்தது. கடந்த 2019ஆம் ஆண்டு 4.8 லட்சமாக இருந்த வாக்கு வித்தியாசம் இப்போது வெறும் 1.5 லட்சமாக சரிந்துள்ளது. சிவசேனா என்ற மாநில கட்சியை உடைத்ததன் விளைவை மகாராஷ்ட்ராவில் பாஜக அனுபவித்துள்ளது. விவசாயிகளை கொடுமைப்படுத்தியதற்கு பஞ்சாபில் பாஜகவிற்கு விவசாய பெருங்குடி மக்கள் பாடம் புகட்டிவிட்டார்கள்.  இவை எல்லாவற்றையும் விட, ஜெய் ஸ்ரீராம் என்ற முழக்கத்தை வைத்து அரசியல் செய்த மோடி – ஆர்.எஸ்.எஸ். கும்பல், தேர்தல் முடிவுக்கு பிறகு ராமர் தங்களுக்கு கை கொடுக்கவில்லை என்பதால் “ஜெய் ஜெகந்நாத்”என்ற முழக்கத்திற்கு மாறிவிட்டார்கள். கடவுளையே மற்றியவர் மோடி ஒரு பச்சை சுயநலவாதி என்ற முகத்திரை கிழிந்து தொங்குகிறது.

மோடியை ஆட்டம் காணவைத்த அஜய் ராய்

தேசிய இனங்களின் எழுச்சிக்கு முன்பாக மோடியின் இந்துத்துவா கொள்கை படுதோல்வி அடைந்துள்ளது. ஜம்மு-காஷ்மீரில் பொறியாளர் ரஷீத், காலிஸ்தான் ஆதரவாளர் அம்ரித் பால் சிங், இந்திரா காந்தி கொலையாளிகளில் ஒருவரான  பியாந்த் சிங்கின் மகன் சரப்ஜித் சிங் கல்சா ஆகியோர் வெற்றி மோடியின் சர்வதிகாரத்திற்கு எதிரான தேசிய இன எழுச்சியாகவே சித்தரிக்கப்படுகிறது. ஒட்டு மொத்தத்தில், அறுதிப் பெரும்பான்மையுடன் பாஜக ஆட்சி அமைக்கும் என்ற அனைத்து ஆரூடங்களையும் பொய்யாக்கி, மோடியின் சர்வாதிகாரத்திற்கு சவுக்கடி கொடுத்துள்ளது 18-வது மக்களவைத் தேர்தல். மோடிக்கு கிடைத்துள்ள இந்த தோல்வி, இந்தியாவின் ஆன்மாவான மதச்சார்பின்மைக்கும், பிரிவினைவாத எதிர் பேச்சுக்கும் கிடைத்த பதிலடியாகவே பார்க்கலாம்.

இந்திய தேர்தல் அரசியல் வரலாற்றில் மோடி ஒரு சர்வாதிகாரி என்பதை தொடர்ச்சியாக நக்கீரனில் எழுதி வருகின்றேன். அவரின் தேர்தல் முடிவு எப்படி இருக்கிறது என்பதை முன்பே பல அத்தியாயங்களில் எழுதியுள்ளேன். அவை மக்கள் தீர்ப்பு முன்பு உண்மையாகிவிட்டதை பெருமையோடு பகிர்ந்து கொண்டு, சர்வாதிகாரத்திற்கு எதிராகவும் மதச்சார்பின்மைக்கு ஆதரவாகவும் களமாடி தங்களின் தீர்ப்பை அளித்த இந்திய மக்களை ஆரத்தழுவி முத்தமிடலாம்.

பாஜகவின் கூலிப்படையான தேர்தல் ஆணையம்

எத்தனை எத்தனை பொய்களை மிஞ்சி இந்த வரலாற்று சாதனையை இந்திய மக்கள் கொடுத்திருக்கிறார்கள். தேர்தல் முடிவு வெளியாவதற்கு முன்பாகவே கருத்து கணிப்பு என்ற போர்வையில் ஊடகங்கள் செய்த பித்தலாட்டங்கள், மத்திய விசாரணை முகமைகளை கையில் வைத்துக்கொண்டு மோடி செய்த சர்வாதிகாரத்தனம், தேர்தலின் கண்ணியம் கெட்டுப் போகும் போது கூட கண்ணை மூடிக்கொண்டிருந்த தேர்தல் ஆணையத்தின் செயல்பாடுகள் என பல நெருக்கடிகளுக்கு மத்தியில் தான் இந்தியா கூட்டணியின் முதுகை தட்டிக்கொடுத்தும் பாஜகவை தலையில் கொட்டு வைத்தும் ஒரு தேர்தல் முடிவை மக்கள் கொடுத்திருக்கிறார்கள்.

 

பொய்யான கருத்துக்கணிப்பு:

 

ஜூன் 1 ஆம் தேதி வெளியான அனைத்து ஊடகங்களின் கருத்துக்கணிப்புகளும் 350க்கும் மேற்பட்ட இடங்களை பாஜக தனித்துக் கைப்பற்றும் எனக் கூறின. நியூஸ் 24 டுடே வெளியிட்ட கருத்துக்கணிப்பில் 400க்கும் மேற்பட்ட இடங்களை பாஜக கூட்டணி பிடிக்கும் என குறிப்பிட்டது. இந்தியா டுடே-ஆக்சிஸ் இந்தியா கருத்துக்கணிப்பு 361-401 இடங்களும், டுடே சாணக்கியா பாஜகவுக்கு 335 இடங்களையும் பாஜக கூட்டணிக்கு 400 இடங்களையும் கொடுத்தது.

மோடி மீடியாவின் தேர்தல் கருத்துக்கணிப்பு

தி டைம்ஸ் நவ் – இ.டி.ஜி கருத்து கணிப்பு 358 இடங்களை பாஜகவுக்கு வழங்கியது. ரிபப்ளிக் 359 இடங்களை பாஜக தனித்து கைப்பற்றும் எனக் கூறியது. நியூஸ் 18 கருத்து கணிப்பில் 315 இடங்களை பாஜக வசப்படுத்தும் எனக் குறிப்பிட்டது. இத்தனை ஊடகங்களும் பாஜகவின் ஊதுகுழலாக இருந்துள்ளன என நிரூபித்துவிட்டது மக்களின் தீர்ப்பு. அதாவது, தமிழ்நாடு புதுச்சேரியில் காங்கிரஸ் கட்சி 10 இடங்களில் தான் களமிறங்கியது. ஆனால், மோடியின் மீடியா மாஃபியாக்கள் 12-13 இடங்களை காங்கிரஸ் கைப்பற்றும் என கூறின. ஜார்க்கண்டில் சி.பி.எம் ஒரே ஒரு தொகுதியில் மட்டுமே போட்டியிட்டது. ஆனால்,3 இடங்களில் வெற்றி பெறுவார்கள் என்று கூறியது. கேரளாவில் பாஜக அதிக வெற்றியை பதிவு செய்யும் என்றது மோடி மீடியா. ஆனால், முடிவு வேறாக வந்துள்ளது.

மகாராஷ்டிரா, உத்தரப்பிரதேசத்தில் பாஜக அமோக வெற்றி பெறும் என்றது கருத்து கணிப்பு முடிவுகள். ஆனால், நடந்தது என்ன, ஒட்டு மொத்தமாக உத்தரப்பிரதேசத்தில் 80 இடங்களில் பாஜக வெறும் 33 இடங்களில் மட்டுமே வெற்றி பெற்றுள்ளது. 2014-ல் 71 இடங்களிலும் 2019ல் 62 இடங்களிலும் வென்ற பாஜக 2024ல் வெறும் 33 இடங்களை கைப்பற்றி பரிதாப நிலைக்கு தள்ளப்பட்டுள்ளது. உத்தரப் பிரதேசத்தில் பாஜகவை எதிர்க்கும் துணிவு யாருக்கும் இல்லை என்று பேசிய ஸ்மிருத்தி இராணி வெற்றி பெறுவார் என்றார்கள். அவருக்கும் படுதோல்வி. காங்கிரஸ் – சமாஜ்வாதி படுதோல்வி அடையும் என்றது கருத்து கணிப்பு, ஆனால், பாஜகவை விட 37 இடங்களில் சமாஜ்வாதியும் 6 இடங்களில் காங்கிரஸ் கட்சியும் முத்திரை பதித்துள்ளது.

உ.பி. புல்டோசரை வீழ்த்திய மூவர் அணி

மகாராஷ்டிராவில் பாஜக அதிக இடங்களைக் கைப்பற்றும் என்று கூறிய கருத்து கணிப்பு முடிவுகள் தவிடு பொடியாகியுள்ளது. இந்தியாவின் அதிக அரசியல் நெருக்கடி உள்ள மாநிலமாக பார்க்கப்பட்ட மகாராஷ்டிராவில் பாஜக படு தோல்வியைக் கண்டுள்ளது. 48 தொகுதிகளைக் கொண்ட இங்கு 30 தொகுதிகளை இந்தியா கூட்டணி கைப்பற்றியது. 2019ல் பாஜக 23 இடங்களிலும் 18 இடங்களில் அதன் கூட்டணி கட்சிகளும் வென்றன. அதே நிலை தொடரும் என்றன மோடியின் மீடியா மாஃபியாக்கள். ஆனால், 2004ல் கருத்துக்கணிப்பு பொய்யானது போலவே 2024 கருத்துக்கணிப்புகளையும் பொய்யாக்கிவிட்டது தேர்தல் களம். 

 

ஒட்டுண்ணி பாஜக விழுங்கிய கட்சிகளும்:

மோடி – ஆர்.எஸ்.எஸ் - இந்துத்துவா கருத்தியல்களை எதிர்த்த கட்சிகள் மட்டுமே தற்போது இந்திய அரசியலில் உயிர்பெற்று வந்துள்ளன. மோடியை எதிர்த்த, விசிக தலைவர் தொல்.திருமாவளவன், திமுக தலைவர் ஸ்டாலின், காங்கிரஸ் மூத்த தலைவர் ராகுல் காந்தி, மம்தா பானர்ஜி, சரத்பவார், உத்தவ் தாக்கரே உள்ளிட்டவர்களின் கட்சிகள் வலுவான வெற்றியைப் பதிவு செய்துள்ளன. ஆனால், அரசியல் ஒட்டுண்ணி போல் இருந்து கொண்டு அதிமுக, ஆந்திராவின் ஒய்.எஸ்.ஆர்.பி., ஒடிசாவின் பிஜூ ஜனதாதளத்தின் மீது சவாரி செய்த பாஜக அந்த கட்சிகளின் அடையாளத்தை அழித்துவிட்டது.

பாஜக விழுங்கிய நவீன் - ஜெகன்

மோடி அமைச்சரவையில் ரயில்வே துறை அமைச்சராக இருந்த அஸ்வினி வைஷ்ணவ் ஒடிசா மாநிலத்தின் பிஜூ ஜனதாதளத்தின் உதவியுடன் தான் மாநிலங்களவைக்கு சென்று ரயில்வே அமைச்சராகவே ஆனார். பாஜகவையும் மோடியின் சர்வாதிகாரத்தனத்தையும் சரியான நேரத்தில் எதிர்க்காததன் விளைவை நவீன் பட்நாயக் இன்று கண்டடைந்துவிட்டார். கூட்டணியில் இருந்த பிஜூ ஜனதாதளத்தையே ஒட்டுண்ணி பாஜக விழுங்கி, ஆட்சியை கவிழ்த்துவிட்டது. இதே நிலைமை தான் ஆந்திராவின் ஜெகன் மோகனுக்கும் நேர்ந்துள்ளது. பாஜகவின் ஒட்டுண்ணி தனத்திற்கு பலியான மற்றொரு கட்சியாக அதிமுக இருக்கிறது. 2017க்கு பிறகு பாஜகவின் கைப்பாவையாக இருந்த அதிமுக 2019க்கும் பிறகு பாஜகவில் மொத்தமாக கரைந்துவிட்டது. இப்போது, அதிமுகவின் நிலை என்ன? ஒட்டுண்ணி பாஜக அதிமுகவை முழுவதுமாக தின்று செறித்ததால் தனது அரசியல் எதிர்காலத்தையே தொலைத்துவிட்டு நிற்கிறது அதிமுக. இதே நிலை தான், ஏக்நாத் ஷிண்டேவுக்கும். ஏக்நாத் ஷிண்டேவை வைத்து சிவசேனாவை உடைத்து பாஜகவுக்கு மகராஷ்டிரா பாடம் கற்றுக்கொடுத்துவிட்டது. அங்கு, பாஜகவும் வெற்றி பெறவில்லை. ஏக்நாத் ஷிண்டேவும் காணாமல் போய்விட்டன.

பாஜக திண்று செரித்த அதிமுக

 

மதவாத – சாதியவாத – பிரிவினையின் தோல்வி:

 

2024நாடாளுமன்ற தேர்தல் நுணுக்கமான பல அம்சங்களை வெளிப்படுத்தியுள்ளது. அதில், முக்கியமானது, மோடி கையில் எடுத்த மதவாத, இனப் பிரிவினைவாதத்திற்கு எதிராக இந்தியர்கள் நிற்கிறார்கள். இதற்கு பல உதாரணங்கள் உள்ளன. உத்தரப்பிரதேசத்தில் ’புல்டோசரை யார் மீது ஏற்றலாம் என்று யோகி ஆதித்யநாத்திடம் கற்றுக்கொள்ளுங்கள்’ என்று கூறிய மோடி  மீதே புல்டோசரை ஏற்றி பாடம் புகட்டியிருக்கிறார்கள் மக்கள். இஸ்லாமிய வெறுப்பு அரசியலை பேசிய பாஜக உத்தரபிரதேசம் அயோத்தியிலேயே தோற்றுள்ளது. மணிப்பூரில் மொய்தி – குக்கு இன மக்களிடையே பாஜக பிரிவினையை ஏற்படுத்தி அரசியல் செய்தது. மணிப்பூரில் 227 பேர் கொல்லப்பட்டனர். 70,000 பேர் அகதிகளாக்கப்பட்டனர். கலவரத்தை தடுக்க பாஜக தவறியது. நாடாளுமன்றத்திற்கு வெளியேயும் உள்ளேயும் திமுக – காங்கிரஸ் கடுமையாக நீதி கேட்டு போராடியது. விசிக தலைவர் திருமாவளவன், ரவிக்குமார் உள்ளிட்டோர் மணிப்பூர் களத்தை நேரில் சென்று ஆய்வு செய்தனர். ஆனால், மோடி வாய் திறக்கவே இல்லை. மணிப்பூரில் 2 தொகுதிகளையும் காங்கிரஸ் கைப்பற்றியுள்ளது. அங்கு, காங்கிரஸ் பெற்ற வாக்குகளை கணிக்கும் போது, மொய்தி – குக்கி இரண்டு இனமக்களுமே பாஜக மீது கடும் கோபத்தில் இருக்கிறார்கள் என்பது வெளிப்பட்டுவிட்டது.

 

ஜம்மு – காஷ்மீரில் பாஜக மீதான கோபம் மக்களிடம் தேர்தல் முடிவுகள் மூலமாக வெளிப்படத்தொடங்கிவிட்டது. 2019 ஆட்சிக்கு வந்த பிறகு காஷ்மீருக்கு சிறப்பு அந்தஸ்து அளிக்கும் சட்டப்பிரிவு 370-ஐ மோடி அரசு நீக்கியது. இதன் விளைவுகளை காஷ்மீர் மக்கள் பாஜகவுக்கு அளிக்கின்றனர். காஷ்மீரின் பாராமுல்லா தொகுதியில் ஆச்சரியமான முடிவை மக்கள் கொடுத்துள்ளனர். பொறியாளர் ரஷீத் என்று அழைக்கப்படும் சுயேச்சை வேட்பாளர் அப்துல் ரஷித் ஷேக் வெற்றி பெற்றுள்ளார். 2019லிருந்து உபா வழக்கில் சிறையில் வாடும் ரஷித் வெற்றி, மோடியின் சர்வாதிகாரத்திற்கு எதிரான ஜனநாயகக் குரல் என்பதை மறுக்க கூடாது.

UAPA கைதி அப்துல் ரஷீத் ஷேக் எம்.பி.

அயோத்தியில் ராமர் கோயில் கட்டப்பட்டுள்ள இடத்தில் தலித் மக்கள் பாஜகவுக்கு எதிராக திரட்சியான வாக்கை அளித்துள்ளனர். வளரும் சமூகங்களின் ஆய்வு மையம் - லோக்நிதி சிந்தனைக்குழு நடத்திய ஆய்வில் 8 சதவிகிதத்திற்கும் குறைவான மக்களே அயோத்தியில் புதிய கோயில் வேண்டும் எனக் கூறியுள்ளனர். மீதமிருக்கும் 92 சதவிகிதம் பேர் அயோத்தியிலேயே பாஜகவின் இந்துத்துவத்திற்கு எதிராக எழுச்சிபெற்று கூடியுள்ளனர்.

மத்திய உள்துறை இணை அமைச்சரான உத்தரப்பிரதேசத்தை சேர்ந்த அஜய் மிஸ்டாவின் மகன் லக்கிம்பூர் கெனியில் விவசாயிகள் மீது டிராக்டரை ஏற்றி கொலை செய்தார். இப்போது, மத்திய உள்துறை இணை அமைச்சர் அஜய் மிஸ்ரா படு தோல்வி அடைந்துள்ளார். மக்கள் விரோதமாக செயல்பட்ட மோடி அமைச்சர்கள் 19 பேர் 2024 நாடாளுமன்ற தேர்தலில் தோல்வியை தழுவியுள்ளனர். மோடி அமைச்சரவையில் இடம்பெற்றிருந்த 20 அமைச்சர்கள் தங்கள் தொகுதிகளில் தோல்வியடைந்துள்ளனர்.

 

மண்ணைக் கவ்விய மோடியின் அமைச்சர்கள்

கொடுங்கோல் ஆட்சி - மோடியின் தோல்வியே சாட்சி:

 

தமிழ்நாடு, பஞ்சாப், மணிப்பூர், மிசோரம், சிக்கிம் ஆகிய ஐந்து மாநிலங்களில் மாநில கட்சிகளுக்கு எதிராக நேரடி போட்டியில் ஈடுபட்ட பாஜக படு தோல்வியை சந்தித்துள்ளது. தமிழ்நாட்டில் 23 தொகுதிகளிலும், பஞ்சாபில் 13 தொகுதிகளிலும் மணிப்பூரில் 2 தொகுதிகளிலும் சிக்கிம், மிசோரம் ஆகிய இடங்களில் தலா ஒரு தொகுதிகள் என 40 தொகுதிகளை மொத்தமாக பாஜக இழந்துள்ளது. இந்த மாநிலங்கள் மோடியின் பாசிச குணத்திற்கு எதிராகவும் அடிப்படையில் தேசிய இன விடுதலையைக் கோரும் மாநிலங்களாகவும் உள்ளன. தாமரையின் செல்வாக்கும், மோடியின் சர்வாதிகாரத்தனமும் தேசிய இனங்கள் முன் கைகட்டி நிற்கிறது. பஞ்சாப் மாநிலத்தில் ஊழல், விவசாயிகளின் துயரம், போதைப்பொருள் புழக்கம் அதிகரிப்பு, இவை எல்லாவற்றையும் விட மாநில அரசுகளை அழிக்கநினைக்கும் மோடியின் அரசியல் நடவடிக்கைக்கு எதிராக மக்கள் எழுச்சியுடன் வாக்களித்து பாஜகவை தோற்கடித்துள்ளன.

 

NSA கைதி அம்ரித்பால் சிங் எம்.பி.

அஸ்ஸாமின் திப்ருகர் மத்திய சிறையில் தேசிய பாதுகாப்புச் சட்டத்தின் (NSA) கீழ் அம்ரித்பால் சிங் ஒரு வருடத்திற்கும் மேலாக தடுப்புக் காவலில் உள்ளார். இவரைப் போலவே, பாராமுல்லா தொகுதியில் பொறியாளர் ரஷீத் வெற்றியும் பார்க்கப்படுகிறது. மோடி ஆட்சியில் 2019ல் உபா வழக்கில் சிறையில் அடைக்கப்பட்ட ரஷித் வெற்றி, மோடியின் சர்வாதிகாரத்திற்கு தேர்தல் வெற்றியாகவேகணிக்கப்படுகிறது.

சமத்துவ இந்தியா என்ற கனவை அடைவதற்கு நீண்ட காலம் இன்னும் போராட வேண்டி இருக்கிறது. ஆனால், நீதி, சுதந்திரம், சமத்துவம், சகோதரத்துவம் ஆகியவற்றை அடித்தளமாக கொண்ட குடியரசின் அடித்தளத்தை வலுப்படுத்துவது மோடி காலத்தில் அதிமுக்கியமானது. மோடியின் சர்வாதிகார கரங்களில் இருந்து இந்தியாவை மீட்டு, குடியரசின் அடித்தளத்தைக் கட்டமைக்க பாடுபட்டு உயிர்த்தியாகம் செய்த, இன்றும் சிறையில் அடைக்கப்பட்டுள்ள சமூக ஆர்வலர்கள், பத்திரிகையாளர்கள், அரசியல் தலைவர்கள் ஆகியோருக்கும் சமத்துவ குடியரசிற்காக கனவு கண்டு கொண்டிருக்கும் மக்களுக்கும் இந்த தேர்தல் நிம்மதி பெருமூச்சை விட வைத்துள்ளது.

- வன்னி அரசு